Hatutan.com, (27 Fevereiru 2023), Díli-Durante semana ida, hosi loron 21 to’o loron 27 fulan-Fevereiru ne’e, Autoridade Protesaun Sivíl (APC, sigla portugés) rejista uma hamutuk 73 iha territóriu  nasionál hetan estragu kauza hosi dezastre naturál.

Anin-boot. Foto/Elio dos Santos da Costa

Uma sira ne’e balun udan ho anin mak sobu no balun fali tanba kauza hosi inséndiu ka ahi mak han.   “Durante semana ida iha rejiaun Timor-Leste normál no akontese tipu dezastre hanesan anin-boot, ahi-han, no rai-halai, Sentru Nasional Operasaun Protesaun Sívil, Autoridade Protesaun Sivíl  (APC), rejista Xefe familiahamutuk 73 mak  sira-nia uma hetan estragu,” Diretór Relasaun Externa no Komunikasaun APC, Anacleto Caetano, hateten liuhosi konferénsia imprénsa iha kna’ar fatin, Caicoli,  Díli, Segunda (27/02/2023).

Dadus sira uma hetan estragu iha munisípiu sira, mak hanesan iha Munisípiu Aileu anin sobu uma-ida (1), Covalima (uma-ida), Díli ahi-han uma-ida no xefe família hamutuk 50 mak afetadu, anin-sobu uma-ruma iha Ermera, iha Liquiça anin-sobu ruma ida (1), no ahi-han mós uma-ida (1), Lautem, ahi-han uma-rua  (2), anin-sobu uma-rua (2) iha Manatuto, RAEOA anin-sobu uma-sia (9),  iha Viqueque anin-sobu uma-tolu (3) no ahi-han uma-ida (1).

Hafoin akontesimentu dezastre hirak ne’e, Komandu Autoridade Protesaun Sívil nian iha munisípiu sira ne’e tun kedan bá terrenu halo levantamentu dadus no hamutuk ho parseiru relevante sira fornese ona asisténsia emerjénsia bá familai afetadu sira mak hanesan hahan no la’os hahan.

Ekipa sira Autoridade Protesaun Sívil nian iha munisípiu afetadu hirak ne’e kontinua halo levantamentu datelladu kona-bá sasan sira ne’ebé mak estragus no lakon.

Sentru Nasionál bá Operasaun Protesaun Sívil nian halo ona koordenasaun ho Diresaun Nasionál bá Meteorolójia no Jeofízika (DNMG-sigla portugés) ho Ministériu Transportes no Komunikasaun (MTK) observa kondisaun klima rejiaun Timor-Leste bá loron lima mai oin, hosi loron 24 to’o loron 28 fulan-Fevereiru 2023, katak udan ho intensidade fraku sei kontinua akontese kuaze iha territóriu nasionál, mas prinsipalmente iha rejiaun foho.

 Jornalista: Rogério Pereira Cárceres