Hatutan.com, (03 Abril 2023), Díli—Prezidente Pelican Paradise Group, Datuk Dr. Edward Org informa on aba Prezidente Repúblika (PR), José Ramos-Horta katak, iha fulan Abríl nia laran hahú projetu konstrusaun Otél Fitun Lima iha area Tasi-tolu ho totál budget ba faze dahuluk nian hamutuk billiaun $1-resin.

Prezidente Pelican Paradise Group, Datuk Dr. Edward Org. Foto/Elio dos Santos da Costa.

Datuk Dr.Edward Org hateten, depois de halo lansamentu bá projetu ne’e iha loron 25 Novembru tinan 2022, sira halo servisu barak, primeiru halo konkluzaun bá prosesu tenderizasaun iha fulan Fevereiru, antesipa mós iha terrenu nune’e iha fulan Abríl nia laran bele komesa halo servisu.

Lee Mós: Ramos-Horta Husu Empreza Involve Timoroan Iha Projetu Pelican Paradise, Alkatiri Sujere Aselera

“Faze dahuluk iha pakote rua. Pakote dahuluk sei komesa halo mobilizasaun iha terrenu iha fulan Abríl nia laran. Pakote daruak ne’e boot ami sei kontrata kompañia internasionál sira ne’ebé komesa halo mobilizasaun,” Datuk Dr.Edward Org hateten iha Palásiu Prezidensiál Nicolau Lobato Bairru-Pité, Segunda (03/04/2023).

Tuir akordu ho governu Timor Leste, planu atu muda komunidade nia uma ne’e responsablidade governu nian.

Hosi pelikan paradise nian responsablidade maka halo tuir master plan no mós tenke halo tuir planu jestaun ambientál ne’ebé aprova ona entre governu ho Pelikan Paradise bainhira projetu ne’e hotu ambientál sei aumenta di’ak la’ós aat liu fali.

Benefísiu ba komunidade maka, bainhira projetu ne’e hotu sei sai sidade ne’ebé di’ak no mós iha sanitária di’ak, la hamosu inundasaun no mós Pelican Paradise sei uza rai pursentu 82 atu uza hanesan jardím hodi kuda ai-horis.

“Osan bá projetu ne’e ami antesipa sei boot liu tanba uluk ami halo ho budget ne’e folin konsultan sei tun oitoan. Ha’u fó ezemplu ba faze dahuluk ami nia budget ne’e millaun $200-resin de’it. Maibé agora besik millaun $500. Totál projetu tuir folin agora ami nia kalkulasaun liu Billiaun $1,” Datuk Dr. Edward Org informa.

Bainhira halo lansamentu iha fulan Novembru tinan 2022, Pelican Paradise iha planu ba seguransa no mós hahú hamoos tasi-ibun, agora daudaun Pelican Paradise kontrolla atu garante fatin ne’e kontinua moos to’o tempu konstrusaun hahú.

“Em prinsípiu Pelican Paradise Group la’ós bandu ema halo movimentu iha ne’ebá, maibé kontrolla de’it atu ema la tau foer arbiru. Bainhira ami komesa konstrusaun mós ami sei tau seguransa iha fatin konstrusaun nian,” nia esplika.

Iha enkontru ne’e, Prezidente Repúblika, José Ramos Horta kontente tebes ho progressu preparasaun bá inisiu projetu ne’ebé Pelican Paradise iha, liu-liu tanba Pelican Paradise atu hahú ona konstrusaun.

Pelican Paradise mós troka ideia ho Prezidente Repúblika no rona ideia balun hosi Xefe Estadu atu haree to’ok saida mak bele implementa.

“Tanba ami nia vizaun hanesan ho governu ho povu atu halo projetu ne’e bele hotu ho lalais no mós hadi’a tán ambientál no mós atu loke vaga servisu. Ami fiar katak, ema hotu-hotu nia aspirasaun iha prosesu dezenvolvimentu laran ami sempre halo konsultasaun ho governu,” nia haktuir.

Pelican Paradise sei uza Timoroan barak, tanba iha kontratu konstrusaun ne’e fó prioridade ba Timoroan, fó treinamentu bainhira projetu ne’e hotu. Timoroan na’in hira ne’e seidauk hatene klaru maibé sei barak tanba projetu boot.

Pelican Paradise espera katak Timoroan hakarak servisu, tanba objetivu primeiru mak atu halo projetu ne’e no loke vaga servisu ba Timoroan.

Jornalista: Vito Salvadór