Hatutan.com, (18 Abríl 2023), Díli-Ulun-boot Uma Kreda Katólika Timor-Leste nian, Sua Eminénsia Virgílio Kardeál do Carmo da Silva,  SDB, husu Timoroan hothotu nia responsábilidade kontribui liután bá festa demokrásia iha Timor-Leste iha ámbitu kampaña to’o eleisaun parlamentár ho pás.

Lee Mós : Dom Virgílio Kardeál do Carmo husu GAM ho GAR Haburas Virtude Domin

Kalendáriu kampaña partidu polítiku sira-nian ne’ebé kompete iha eleisaun parlamentár 2023 sei hahú iha loron 19 fulan-Abríl to’o loron 18 fulan-Maiu 2023 no eleisaun parlamentár iha loron 20 fulan-Maiu 2023.

Sua Eminénsia Virgílio Kardeál do Carmo da Silva, SDB simu audénsia ho Komandante Jerál PNTL ho nia Adjuntu iha Paço Episcópal, Lecidere, Díli, Tersa (18/4/2023). Foto/Elio dos Santos da Costa

Hafoin sorumutu ho ulun-boot sira Polísia Nasionál Timor-Leste nian (PNTL), Komisáriu jerál Henrique da Costa ho nia adjuntu Komisáriu Polísia Pedro da Costa Belo, iha Paço Episcópal, Lecidere, Díli, Tersa (18/4/2023), Dom Virgílio Kardeál do Carmo da Silva, SDB husu atu timoroan hotu haka’as an  no hothotu iha responsábilidade másmu  atu bele kontribui bá iha festa demokrásia ida-ne’e, liu-liu bá Pás.

Dom Virgílio hateten, ema hotu kleur ona hein hela kona-bá festa boot demokrásia. Ne’e duni, ema sempre tau festa demokrásia, no iha festa ne’e, ema hotu hakarak atu kontente no haksolok.

“Festa ida-ne’e iha ita-nia odamatan oin, mai konvida ita hotu atu partisipa hodi tau nafatin, ita hotu haka’as aan, atu ezerse ita-nia liberdade ne’e,” Dom Virgílio fó hanoin.

Ema hotu tenke hatene katak, buat hotu atu la’o ho di’ak, tenke mai mai hosi ema ida ninia liafuan rasik, no nia hahalok sira hotu, hodi bele kontribui bá iha kampaña ne’ebé atu mai dadaun ona.

“Ida-ne’e responsábilidade ita hotu nian. Ita-hotu hakarak atu to’o loron 21 fulan-Maiu ne’e, eleisaun halo didi’ak, no durante fulan ida kampaña ne’e, ema hotu bele sente duni festa ida ne’e, ema hotu ki’ik, boot, katuas, ferik, ema hotu sente kontente hakarak atu haree no rona, ida-ne’e, reaponsábilidade ita hotu ninian,” Dom Virgílio fó hanoin.

Dom Virgílio Kardeál do Carmo da Silva, SDB hatutan, durante ne’e servisu oioin ne’ebé PNTL halo, Igreja mós fó apoiu, tanba ida-ne’e mak enkontru ho Komandante Jerál PNTL ho nia adjuntu bele mós haree hamutuk bá oin, oinsá sira bele hadi’ak liután servisu hamutuk entre Igreja ho instituisaun PNTL.

Komisáriu Jerál PNTL, Komisáriu  Henrique da Costa haktuir, vizita ida ne’e atu komprimenta Dom Virgílio, no husu nafatin apoiu hosi Igreja ninian para bele hatutan nafatin mensajen pás nian bá komunidade sira.

“Agora dadaun, ita atu tama bá iha kampaña no mós eleisaun, husu atu ema hotu bele ezerse sira-nia direitu demokrátiku id- ne’e tuir dalan ne’ebé hakmatak no pás,” Komisáriu Polísia Henrique hateten.

Jornalista: Rogério Pereira Cárceres