Hatutan.com, (04 Juñu 2023), Díli–Vitória partidu Conselho Nacional Reconstrução Timorense (CNRT) iha eleisaun parlamentár,  21 fulan-Maiu 2023, inkui fó apoiu determinasaun bá vitória Prezidente Repúblika, José Ramos-Horta iha eleisaun prezidensiál 2022,  bele dehan, la’ós prezente ne’ebé simu hosi bandeja de’it. Maibé,  investimentu signifikativu iha tinan-rua liu nia laran, Xanana Gusmão halo no kompleta ho nia “aparellu” ka rekursu pertinente sira  iha jestaun no kapasidade organizasaun/konsolidasaun partidu nian ne’ebé lidera hosi Francisco Kalbuadi Lay.

Lee Mós : Povu Fó Fiar Bá CNRT Tanba Hakarak Mudansa

Povu entosiazmu simu Prezidente CNRT, Kay Rala Xanana Gusmão ho Sekrétariu Jerál CNRT, Francisco Kalbuadi Lay iha ámbitu kampaña Partidu CNRT nian. Foto/Dok.Espesiál

Sekretáriu Jerál partidu CNRT,  Francisco Kalbuadi Lay, ho sakrifisiu no dedikasaun tomak estrutura partidu CNRT nian hosi nivel aldeia, suku, postu, munisípiu to’o nivel  nasionál, inklui grupu apoiante sira bá Xanana Gusmão halo servisu ida di’ak tebes ho estratéjia no badinas hodi manan no konvense vitória bá CNRT iha eleisaun rua tuituir malu; eleisaun prezidensiál 2022 ho eleisaun parlamentár 2023.

Ho figura Xanana nian hanesan lider karizmátiku, lider istóriku ka komandante em-xefe FALINTIL nia influensia boot tebes hodi konvense povu Timor-Leste tomak, hosi rai-ulun to’o rai-ikun, tasi feto to’o tasi-mane bá vitória CNRT nian.

Xanana nia influensia hatudu ona katak, bainhira nia ‘tula-liman’ bá kandidatu Prezidente Repúblika  iha eleisaun sira iha istória Timor-Leste nian sempre “manan”. Hahú hosi eleisaun Prezidente Repúblika iha tinan 2007-2012, Ramos-Horta sai Prezidente Repúblika tanba Xanana nia “bensan”.  Iha fali 2012-2017, Xanana tula-liman bá Taur Matan Ruak hodi sai Prezidente Repúblika, liuhosi kompetisaun boot iha eleisaun prezidensiál 2012.

Iha períodu kandidatu Prezidente Repúblika 2017-2022, Xanana ‘tula-liman’ bá Francisco Guterres “Lú Olo”  hodi kompete iha eleisaun prezidensiál no ikus mai ho bensan Xanana nian ne’e lori duni Lú Olo bá sai Prezidente Repúblika.

Lee Mós : Rezultadu Final STAE: CNRT Hetan Kadeira 31 no FRETILIN Kadeira 19

Tebes! Lia-fuan klásiku hosi Bahasa Indonézia ne’ebé ema balun saran bá Xanana dehan, “Xanana Manusia Setengah Dewa” bá Timor-Leste. Buat ne’ebé nia hakarak halo bá povu no rai-ida ne’e sempre akontese tuir nia hakarak. Maske tenke ho sakrifísiu boot no servisu ne’ebé la’ós kaman.

Iha eleisaun parlamentár, 21 fulan-Maiu 2023, Xanana ho nia  naran boot, aumenta tan ho servisu no sakrifisiu lubuk ida, ne’ebé sai hanesan matan, tilun no ibun bá povu sira durante iha situasaun difisil, liuliu iha pademia global Covid-19 aumenta tan ho situasaun kalamidade 04 fulan-Abríl 2021,  halo povu ida-ne’e tau esperansa boot liubá Xanana no hakarak Xanana fila duni bá ukun hodi hadi’a rai ida-ne’e bá dalan progresu.

Prezidente CNRT, Kay Rala Xanana Gusmão konversa ho Sekrétariu Jerál CNRT, Francisco Kalbuadi Lay. Foto/Dok.Espesiál

Aktu eroiku no simplisidade bá toba kalan-tolu iha estrada laran resintu Sentru Saúde Vera-Cruz, Díli,  hodi  luta no ezije bá ukun na’in-sira  atu  entrega mate-isin Armindo Borges, ne’ebé mate ho Covid-19 iha fulan-Abríl 2021, kontribui maka’as bá povu nia determinasaun atu fó fiar liután bá Xanana.

Atividade karitativa  sira Xanana halo hale’u territóriu nasionál,  ne’ebé ema balun politiza hodi konsidera “soe rai-rahun bá povu nia matan” kontribui mós povu hodi depozita sira-nia konfiansa bá Kay Rala Xanana Gusmão.

Lee Mós : Taur Matan Ruak Parabeniza Povu Tomak Espesiál CNRT

Liu loron ida, dezastre naturál 04 Abríl 2021, Xanana ho nia ekipa ki’ik ida tuun direta bá lolo-liman bá povu bainhira povu terus, lori ai-han ka nesesidade báziku bá povu sira ne’ebé sofre liu dezastre ne’e, inklui hamutuk ho povu sira fase no hamoos povu nia uma ne’ebé bee tama-borus ho tahu-nurak, uza rekursu balun ne’ebé bele ajuda mós konventu sira madre sira-nian ne’ebé sofre hosi dezastre naturál ne’e.

“Umildade” Xanana nian ne’e halo povu simpatia tebes no lori povu saudades ho Xanana atu fila  bá ukun. Hosi rezultadu sira servisu maka’as, hatene organiza no iha estratéjia forte hodi mobiliza simpatia povu nian ne’ebé hatudu hodi Xanana ho nia Sekretáriu Jerál  Francisco Kalbuadi Lay, fó duni fuan di’ak bá  Partidu CNRT ne’ebé iha eleisaun parlamentár 2017 hetan de’it kadeira 21 iha Parlamentu Nasionál     ho persentajen votu 29, 46% no liuhosi eleisaun parlamentár 2023 haksoit  maka’as hodi hetan kadeira 31 ho persentajen votu 41,62%.

Esforsu sira no determinasaun hosi lideransa estratéjiku partidu CNRT nian, Kay Rala Xanana Gusmão ho Francisco Kalbuadi Lay no sira seluk tan, fó rezultadu di’ak bá vitória CNRT nian no sai hanesan esperansa boot bá povu atu bele iha mudansa ukun hosi períodu 2023-2028.

Xanana rei Madre nia liman. Foto/dok.Espesiál

Liuhosi entrevista ida ho jornalista sira,  foin lalais ne’e, iha Díli, Sekretáriu Jerál Partidu CNRT,  Francisco Kalbuadi Lay hateten,  votu konfiansa bá partidu CNRT iha eleisaun prezidensiál, 19 fulan-Marsu 2022  ho eleisaun parlamentár, 21 fulan-Maiu 2023, atu hatudu katak povu ne’e hakarak iha mudansa  hafoin VIII Governu Konstitusionál nia mandatu la iha mudansa signifikativu bá povu nia moris di’ak no bá nasaun nia prosperidade.

 Iha tinan-tolu ikus, 2019-2022,  Timor-Leste enfrenta situasaun ida difisil tebes, Pandemia global Covid-19, dezastre natural 2021 mai tan funu Ukránia vs Rúsia, fó impaktu negativa bá dezenvolvimentu ekonomia no dezenvolvimentu nasionál.

Ho situasaun tolu ne’e, sai hanesan oportunidade di’ak bá lideransa estratéjiku na’in-rua iha CNRT, Kay Rala Xanana Gusmão ho Francisco Kalbuadi Lay,  bá moris ho povu, serve povu ho domin liuhosi atividade karitativa sira no atividade produtivu balun ne’ebé ajuda tebes povu ida-ne’e hosi terus sira-ne’e.

“Povu ida-ne’e sente rasik Xanana ho CNRT nia domin boot bá sira no sira rasik halo reflesaun kona-bá Xanana nia kariñu bá povu. Maske Xanana ho CNRT la ukun, maibé bainhira povu halerik Xanana bá halerik ho sira, bainhira povu presiza, Xanana bá fó tulun sira,” Francisco Kalbuadi Lay haktuir.

Estratéjia seluk ne’ebé ajuda mós vitória CNRT iha eleisaun ne’e,  maka maske manan tiha eleisaun Prezidensiál hodi lori Ramos-Horta bá Palásiu Prezidensiál,  CNRT ho nia estrutura la tuur nonook hodi festeja, maibé fila-hikas tuun bá baze no bá povu hodi hala’o konsolidasaun hosi aldeia bá suku no hosi Postu Administrativu mai Munisípiu to’o nasionál.

Durante konsolidasaun ne’ebé lidera direta hosi Xanana Gusmão ho Francisco Kalbuadi Lay,   durante fulan-sia (9) nia laran iha baze, povu sente tebes CNRT nia interese boot bá povu nia hakarak. Nune’e, povu tau fiar bá CNRT atu halo mudansa no povu hadomi tebes partidu CNRT ho Kay Rala Xanana Gusmão.

Sekretáriu Jerál partidu CNRT, Francisco Kalbuadi Lay

Investimentu ho domin no umildade bá povu ne’ebé Xanana Gusmão ho Francisco Kalbuadi Lay no partidu CNRT halo durante situasaun difisil sira,  ikus mai,  povu fó agradese liuhosi sira-nia votu 288,101 (41,62%)  ekivale bá kadeira iha Parlamentu Nasionál 31.

Ukun tinan-lima bá oin, 2023-2028, iha Governu no iha Parlamentu Nasionál iha ona CNRT nia liman. Agora presiza  de’it ezersísiu atu CNRT deside ukun mesak ho halo komunikasaun polítika ho partidu sira ne’ebé hetan asentu iha Parlamentu (FRETILIN, PD, KHUNTO, ho  PLP) ho maneira insidénsia parlamentár ka halo koligasaun ho partidu ruma atu hamutuk bá hetan maioria parlamentár hodi asegura estabilidade Governativa depende bá Xanana no CNRT.  

Jornalista : Vito Salvadór