Hatutan.com, (15 Setembru 2023), Díli-Primeiru Ministru (PM), Kay Rala Xanana Gusmão, husu  membru IX Governu  atu hatuur planu tinan 2024 nian ho di’ak no tenke haree nia prióridade sira.

Lee Mós: Vise-Ministra Finansas Felícia Carvalho Kompromete Servisu ho Di’ak bá Povu

PM Xanana Gusmão. Foto/Elio dos Santos da Costa.

Liuhosi enkontru ho Ministru Interiór (MI), Ministru Defeza (MD), Ministru Justisa (MJ), ho Diretór Jerál Servisu Nasionál Intelijénsia nian (SNI) nian iha Palásiu Governu,  Sesta (15/09/2023), Xanana Gusmão, afirma tan atu membru Governu sira, liuliu hirak ne’ebé tutela bá iha Gabinete Primeiru-Ministru nian atu halo planu servisu ho didi’ak no ho nia prioridade sira.

“Ami hirak tutela diretamente bá sua-exelénsia señor primeiru ministru,  ami mai koalia oitoan kona-bá planu asaun anuál 2024 nian, no ami mós ko’alia kona-bá orsamentu 2024 nian, bá iha ministériu sira, ho instituisaun sira ne’e, tanba, oinsá ami bele asegura para kontinuasaun  servisu ne’ebé maka instituisaun sira ne’e presta bá Estadu,” Ministru Interior (MI), Francisco Guterres, haktuir bá jornalista sira hafoin sorumutu ho PM Xanana Gusmão.

“Buat ne’ebé mak importante tebtebes para halo bá parte Polísia, parte Servisu Migrasaun, Seguransa Sívil, Prevensaun Konflitu, tenke fokus, oinsá atu bele ajuda rezolve sira-nia problemas interna, no atu hasa’e sira-nia kapasidades, atu bele hala’o servisu ho di’ak liután,” Francisco Guterres informa.

Planu sira ne’ebé atu halo, tenke haree mós ho prióridade. Katak, ida ne’ebé mak importante, atu halo uluk, la’ós halo hotu dala-ida. Halo buat ida ne’ebé tenke tuir ministériu nia kbi’it orsamentu.

Bá ministériu interior, prioridade iha 2024 maka, sei re-estrutura hotu ministériu nian rasik, ministériu ninia lei sira, hanesan dekretu-lei, no lei orgánika ne’ebé mak Prezidente Repúblika José Ramos-Horta promulga ona.

Sei reforma no re-estrutura uluk ministériu ne’e, tanba sei hamosu fali diresoens balu, diresoens jerál ida, hodi bele rezolve problema sira bá seguransa rodoviária nian, ida tán maka, kona-bá edukasaun sívika.

Ekipa Ministériu nian, liuhosi Prevensaun Konflitu, sei tun bá baze, oinsá atu sosializa lei bá populasaun lokál sira, hodi mentaliza liután joven sira.

Bá PNTL sira iha Unidade Patrullamentu Fronteira (UPF) nian mak destakadu iha litu fromteiras Terrestre Timor-Leste ho Indonézia, Governu komprometidu atu tenke hadi’a fali sira-nia kondisaun hotu, atu sira bele halo servisu ho di’ak.

Servisu Migrasaun rasik, tuir Francisco Guterres, presiza hadi’a fali sira-nia kondisaun, aumenta tán sira-nia kapasidade hodi bele halo kontrolu ida efetivu no efikásia.

Rekruta tán Membru PNTL

Ministru Francisco Guterres informa, durante sorumutu ho PM Xanana Gusmão  koalia mós kona-bá planu rekrutamentu bá  membru PNTL foun sira iha tinan 2024.

“Koalia kona-bá rekrutamentus polísia nian, tinan oin ne’e, atu halo nusá, sira ne’e hotu, ami informa hotu, no kona-bá limitasaun orsamentu ida ne’e hotu. Tinan oin, ne’ebé, ami tau hela orsamentu ne’e, ami aprezenta ona. Tinan oin mak ita haree,” Francisco Guterres hateten.

Harii  Kuartel Jerál PNTL

Ministru Francisco Guterres, promete mós katak, Governu ida ne’e sei haree fali, oinsá mak hahú prosesu konstrusaun bá Kuartel Jerál foun PNTL ninian iha futuru. Tanba besik tinan sia liu, projetu ne’e paradu de’it.

“La’o ona, agora ita pusa fali. Buat ne’e paradu tinan-sia (9), hahú kedas iha 2014, 2015, mais, ikus mai, dada-malu to’o agora, paradadu hela. Agora, ami hahú fali, ami komesa ona prosesu ne’e tomak, ami iha esperansa katak, iha fins de tinan ne’e, ou tinan oin, ita hahú fali konstrusaun bá iha komandu jerál da polisia,” Ministru Francisco Guterres haktuir.

Jornalista: Rogério Pereira Cárceres