Hatutan.com, (23 Outubru 2023), Díli-Ministru Interiór, Francisco da Costa Guterres, dezafia membru Polísia Nasionál Timor-Leste (PNTL), liu-liu ekipa sira iha Unidade Espesiál Polísia (UEP) atu hala’o kna’ar ho didi’ak no profisionál.

Lee Mós: Austrália Entrega Mákina Harahun Materiál Esplozivu bá PNTL

Ministru Interiór, Francisco da Costa Guterres. Foto/Tome da Silva

Ministru Interiór hateten lia-hirak ne’e durante intervensaun iha seremónia entrega no simu mákina harahun material esplozivu hosi Governu Austrália nia Programa Dezenvolvimentu Polísia Timor-Leste (TLPDP-sigla Inglés), iha Kuartel UEP, Bairro Pite, Díli, Segunda (23/10/2023).

Ministru Francisco da Costa Guterres afirma, Governu no mós Parlamentu Nasionál, liu-liu Komisaun B, ne’ebé trata asuntu negósiu estranjeiru, seguransa no defeza, nia prezensa iha eventu ida ne’e, hatudu katak, estadu ida-ne’e, tau fiar bá UEP atu hala’o sira-nia servisu ho di’ak. Fiar ne’ebé mak Governu sei tau, la’ós de’it fiar ho ibun ‘tutun’, mais tau kondisaun bá UEP atu hala’o sira nia servisu.

Kona-bá ninia vizita maratona ida foin lalais bá iha fronteira sira, hodi haree besik liu kondisaun sira postu fronteira tomak, hamutuk 40 resin. Hahú hosi Munisipiu Covalima, Bobonaro, tama to’o Sakato, iha Rejiaun Administrativa Espesiál Oé-Cusse Ambeno (RAEOA). Viziti maratona ida ne’e, hakarak atu haree kondisaun ne’ebé mak membru UPF sira servisu iha lutu fronteira ne’ebá.

“Hasoru mós imi nia maluk balu ne’ebé maka fó apoia iha polísia fronteiras ne’ebá. Tanba ne’e mak  ho vizita ida ne’e fó ona imprenssaun ida katak, tenke investe bá iha PNTL, iha infraestruturas, iha ekipamentus, iha mós rekursus uamnus rasik, hodi bele polísia hala’o ninia servisu ho di’ak,” Francisco Guterres hakutir.

Unidade Espesial Polísia, hanesan unidade ida ne’ebé sira bolu dehan katak, liman loos Polísia Nasionál Timor-Leste nian. Uainhira situasaun iha terrenu mak polísia baibain ka polísia regulár  sira la konsege ona atua, UEP tenke tun, hodi bele rezolve problema sira ne’e.

Prepara Aan bá ASEAN-Dada Kadoras Mai TL

Iha oportunidade ne’e, Ministru Francisco Guterres, fó hanoin nafatin bá membru PNTL sira tomak, atu prepara aan hodi hasoru eventu importante rua mak hanesan, atu tama bá organizasaun rejional Association of South East Asean Nation (ASEAN), no politika Governu nian atu dada kadoras Greater Sunrise mai Timor-Leste, iha tempu besik mós.

“Ha’u, bolu dala-ida tán ita-boot sira nian atensaun iha eventu rua importante, mak sei mosu iha ita nia rain. Ida, ita atu tama ASEAN, ne’e, presiza tebes ita-boot sira nian servisu. Imi tenke dezempeña imi nian papél ho di’ak, tanba, tama ASEAN, ita tenke preparadu, para atu bele haree buat hotu, atu kontinua tau nafatin seguransa no estabilidade bá ita-nia rain,”  Francisco Guterres hateten.

Tuir Governante ne’e katak, bainhira Timor-Leste tama ona iha ASEAN,sei iha mós buat di’ak no aat mai hamutuk, polísia sira mak iha kbi’it atu bele filtru, atu bele haree.

Jornalista: Rogério Pereira Cárceres