Hatutan.com, (25 Outubru 2023), Díli-Ministériu Defeza (MD) kontrata  Kompañia Wicas Unipesoál, Lda,  halo manutensaun bá ró rua komponente Naval nian ne’ebé durante ne’e avaria ka aat.  Kontrata manutensaun bá ró Naval F-FDTL nian rua ne’e ho valor orsamentu liu millaun $2. Maske nune’e, informasaun ne’ebé Hatutan.com rekolla hosi fontes balun ne’ebé husu labele publika nia identidade katak  deskonfia empreza kontraktor Wicas uza fali tinta parede nian ho marka al-Tex hodi pinta ró nia isin lolon.

Lee Mós: EUA Oferese Aviaun CESSNA Bá F-FDTL Hodi Kontrola Rikusoin Tasi TL

Ró Komponente Naval F-FDTL nian ne’ebé atraka hela iha Portu Díli hodi halo manutensaun. Foto/Tome da Silva

Tuir SOP ka padraun bá prosedura operasionál pinta ró nian tenke utiliza duni tinta espesífiku bá ró nian atu nia rezultadu bele próteze kondisaun ró, inklui iha nia valor estétika.

Iha loron 25 fulan-Outubru 2023, Hatutan.com bá halo observasaun direta bá prosesu manutensaun ró marina rua F-FDTL nian ne’ebé atraka hela iha Portu Díli hodi halo manutensaun. Maibé, membru F-FDTL balun ne’ebé koloka iha Portu Dili hodi tau matan bá manutensaun ró F-FDTL nian ne’e la admite atu Hatutan.com halo observasaun besik ho razaun segredu militár no presiza iha autorizasaun hosi empreza Wicas tanba empreza refere mak responsabilidade tomak bá prosesu manutensaun nian.

Ministru Defeza, Donaciano Costa Gomes “Pedro Klamar Fuik” ne’ebé Hatutan.com konfirma kona-bá asuntun ne’e iha Palasiu Governu, Kuarta (25/10/2023), hateten, nia parte orienta ekipa sira iha Gabinete Inspesaun no Auditoria (GIA) Ministériu Defeza nian atu halo inspesaun no rezultadu hosi relatóriu mak sei haree.

“Ha’u husu ona prosesu inspesaun, halo ona prosesu inspesaun, ha’u fiar katak, relatóriu sei tama iha tempu badak, depois mak ita haree. Tanba ne’e mak ha’u ko’alia katak, parte hothotu envolvidu iha prosesu ne’e tenke halo ho responsabilidade,”  Pedro Klamar Fuik afirma.

Ministru Defeza (MD), Donaciano Costa Gomes “Pedro Klamar Fuik”, informa, kontratu ne’ebé ministériu selebra ho kompañia Wicas, atu halo manutensaun hotu bá ró rua komponente Navál nian ne’ebé tinan barak paradu de’it tanba kondisaun avaria ka aat.

Ró rua ne’e sei iha prosesu manutensaun no ida kuaze 100% atu finaliza. Ida tán fali, iha faze apontamentu bá finalizasaun. Tanba ne’e, Ministériu Defeza fiar katak, prosesu manutensaun ne’ebé kompañia kontraktor halo ne’e bele halo ho di’ak, halo ho responsabilidade, hodi nune’e, ró rua ne’e bele tama fila-fali iha sira nia kondisaun oprasionalidade hanesan baibain.

“Sim, kompañia ida ne’e Wicas maka responsabiliza bá manutensaun. Ne’e, halo manutensaun pakote bá ró rua. Foin mak ha’u hatete ne’e, ida, kuaze finál ona. Ida, iha dezenvolvimentu inisiál bá médiu, mais, ita espera katak, kompromisu ne’ebé mak halo bá iha prosesu manutensaun ne’e, parte rua, liu-liu parte ne’ebé maka halo manutensaun ne’e bele halo ho responsabilidade tuir kalendáriu ne’ebé mak estabelese,” Ministru Donaciano Costa Gomes “Pedro Klamar Fuik” hatán bá Hatutan.com.

Kona-bá espesifikasaun sira saida de’it mak kompañia kontraktor presiza atu hadi’a ka halo manutensaun, Ministru Pedro Klamar Fuik hateten, sasán sira ne’e tuir ninia rekizitu sira.

“Rekezitu ne’e, signifika katak, halo dokájen ida. Saida mak dokájen ida?. Dokájen ida katak, hasa’e ró hosi tasi-laran, sa’e mai rai-maran, no para atu halo saida iha rai-maran, inklui pinta, inklui xapa ne’ebé mak dodook, troka. Inklui manutensaun bá nia mákina sira, bá nia sistema eletróniku, bá buat hothotu ne’ebé bele fó kbiit bá ró ida atu funsiona normál fila-fali,”  Pedro Klamar Fuik hateten.

Kompañia husu Estensaun Tempu Manutensaun

Ministru  Donaciano Costa Gomes “Pedro Klamar Fuik”  hatutan, tuir kontratu inisiál ne’ebé ministériu halo ho kompañia Wicas, katak, prosesu manutensaun bá ró rua ne’e ho durasaun tempu fulan-sia (9).

Maske tempu manutensaun ne’e hotu ona, maibé, ró rua ne’e seidauk finaliza. Tán ne’e maka, na’in bá kompañia Wicas, husu fila-fali bá ministériu atu halo estensaun  tán períodu kontratu, nune’e bele finaliza manutensaun. Nune’e, Ministru Pedro Klamar Fuik, husu kompañia atu aprezenta uluk sira-nia relatóriu ho didi’ak no detallu, molok Governu liuhosi Ministériu Defeza, foti desizaun ruma bá iha pedidu ne’e.

“Kontratu inisiál fulan-sia (9), agora liu tiha ona, sira husu estensaun, mais, presiza hatama relatóriu para ita hatene saida mak halo, problema iha karik iha ne’ebé, halo nusa, tenke parte ne’ebé mak partisipa iha prosesu  manutensaun ne’e, tenke  fó justifikasaun ne’ebé mak di’ak bá  Estadu,” Pedro Klamar Fuik hateten.

Hatutan.com tenta ona atu halo konfirmasaun ho na’in bá kompañia Wicas liuhosi telefónika, maibé lakohi fó nia komentáriu no nia fó fali númeru seluk atu bele diretór balun iha Wicas atu bele  kontaktu, maibé to’o notísia ne’e publika seidauk haruka númeru telefone mai no bainhira tenta fali telefone bá diretór Wicas ne’e la atende no dezvia tiha.    

Jornalista: Rogério Pereira Cárceres