Hatutan.com, (23 Novembru 2023), Díli-Liuhosi reuniaun Konsellu Superiór Defeza no Seguransa, Kinta (23/11/2023), Prezidente Repúblika (PR), José Ramos-Horta, husu bá autoridade sira Defeza no Seguransa nian kontínua tau importánsia bá soberania rai-laran hodi garante pás no estabilidade.

Lee Mós: PNTL ho F-FDTL Tenke Buka Solusaun bá Situasaun Rai-Laran

Portavós  bá Konsellu Superiór Estadu no Konsellu Superiór Defeza ho Seguransa, João Aparício Guterres, relata katak reuniaun Konsellu Superiór Defeza no Seguransa atu trata kestaun sira ne’ebé iha relasaun ho defeza, seguransa no soberania rai laran nian.

Reuniaun Konsellu Superiór Defeza no Seguransa iha Palásiu Prezidensiál, Díli, Kinta (23/11/2023). Foto/Elio dos Santos da Costa

Konsellu Superiór Defeza no Seguransa nu’udár órgaun  konsulta Prezidente Repúblika nian, no iha reuniaun ne’e Xefe Estadu mak prezide atu bele haree ho kle’an situasaun sira ne’ebé iha interese bá defeza no seguransa nasionál.

“Asuntu sira ne’ebé importante trata iha KSDS ne’e labele fó sai, maibé entre membru sira hotu bele halo analiza ne’ebé kle’an liubá kestaun ne’ebé konsidera katak importante tebe-tebes bá defeza seguransa no soberania rai-laran nian,” nia hateten.

Partisipa iha reuniaun Konsellu Superior Defeza no Seguransa ne’e mak Ministru Defeza Donaciano Costa Gomes “Pedro Klamar Fuik”, Ministru Interior Francisco Guterres, Ministru Justisa Amândio de Sá Benevides, Ministru Negósiu Estranjeiru Bendito dos Santos Freitas, Xefe Estadu Maiór Jenerál F-FDTL, Tenente-Jenerál Domingos Raul Falur Rate Laek, Komandante Jerál PNTL, Superintendente-xefe Henrique da Costa,  Parlamentu Nasionál representa husi Vise Prezidente Parlamentu Nasionál Deputada Terezinha Viegas, Deputadu David Dias Ximenes Mandate, Diretór PCIC, Diretór SNI ho sira seluk tan. 

Jornalista: Vito Salvadór