Hatutan.com (03 Janeiru 2024), Díli— Hahú fulan Janeiru to’o Dezembru tinan 2023,  Sekretária Estadu Formasaun Profisionál no Empregu (SEFOPE) liu hosi Diresaun Nasionál Empregu Estranjeiru, konsege haruka joven Timor-oan na’in 5.474 bá servisu iha rai-liur hanesan Austrália, Korea no Japaun.

Traballadór Timoroan sira ne’ebé atu bá servisu iha Austrália, Maiu 2023. Foto/Hatutan.com

Diretór Diresaun Nasionál Empregu Estranjeiru, João Correia Pereira, relata totál númeru ne’e bainhira akompaña hosi Xefe Departamentu Re-integrasaun Alarico Fernandes, Koordenadór Mobilizasaun Traballadór bá servisu iha Korea Súl, Austrália no Japaun, iha salaun SEFOPE Caikoli aprezenta progresu no dezafiu servisu DNEE iha tinan 2023 bá Diretór Jerál no funsionáriu sira iha ambítu avaliasaun dezempeiñu servisu SEFOPE ni’an iha tinan 2023, Kinta (28/12/2023).

Lee Mós: SEFOPE Bandu Traballadór Timoroan bá Korea ho Austrália Utiliza Atributu GAM-GAR

Hosi totál númeru ne’e, Diresaun Nasionál Empregu Estranjeiru konsege haruka joven Timor-oan bá servisu iha Austrália de’it hamutuk ema na’in 4.582, kompostu hosi mane na’in 3.142 no feto na’in 1.440, ne’ebé bá servisu hó kontratu tempu naruk ema na’in 4.001, no kontratu tempu badak ema na’in 581, no traballadór hirak ne’e hanesan traballadór foun ema na’in 2.361 no hanesan traballadór tuan ka return worker ema na’in 2.221.

“Iha parte Korea Súl bá tinan 2023, Diresaun Nasionál Empregu Estranjeiru konsege haruka joven Timor-oan na’in 885 kompostu hosi mane na’in 867 no feto na’in 18, hosi traballadór hirak ne’e, re-entry ema na’in 105 no traballadór foun ema na’in 780, ne’ebé bá servisu iha área Peskas ema na’in 599 no área fábrika ema na’in 286,” Hatutan.com sita komunikadu.

Iha tinan 2023 mós Diresaun Nasionál Empregu Estranjeiru, haruka joven timor-oan na’in hitu hanesan pilotu ba iha Japaun ho durasaun tinan tolu, liu hosi programa TIT (Technical Intern Trainer) kompostu hosi mane na’in tolu no feto na’in-haat.

Jornalista Estajiáriu: Lazaro Pereira Quefi