Hatutan.com, (24 Janeiru 2024), Díli– Prezidente Komisaun Ezekutivu Bee Timor-Leste, Empreza Ppúbliku (BTL,E.P),  Carlos Peloi dos Reis, hateten daudaun ne’e iha ona solusaun bá disputa kanalizasaun bee-moos bá komunidade uma-kain 60 iha Uma-Ana-Iku, Suku Bahu, Postu Administrativu Baucau Vila, Munisípiu Baucau.

Lee Mós: Komunidade Uma-Kain 60 iha Uma-Ana-Iku Triste ho Atitude Autoridade BTL,E.P Baucau Tesi-Kotu Kanu Distribuisaun Bee-Moos bá Sira

Autoridade BTL,E.P Baucau tesi-kotu kanu distribuisaun bee-moos bá komunidade uma-kain 60 iha Uma-Ana-Iku, Suku Bahu, Postu Administrativu Baucau Vila, Munisípiu Baucau. Foto/Hatutan.com

Iha Segunda, 22 fulan-Janeiru 2024, Diretór BTL,E.P Munisípiu Baucau, Adriana Belo da Rosa, foti desizaun ho arrogánsia tesi-kotu kanu distribuisaun bee-moos bá komunidade Uma-Ana-Iku tanba de’it, laiha koordenasaun ho BTL,E.P bainhira liga bee hosi bee-matan Uailia, Baucau, bá komunidade Uma-Ana-Iku sira-nia horik fatin liuhosi apoiu Programa Nasionál Dezenvolvimentu Suku (PNDS).  

Atitude Diretora BTL,E.P Munisípiu Baucau nian ne’e, komunidade Uma-Ana-Iku ho autoridade Suku Bahu konsidera hanesan krime abuzu poder no krime dano agravadu. Nune’e, komunidade sira halo keixa bá Polísia Munisípiu Baucau tanba bee ne’ebé dada ne’e tuir programa PNDS nian no alvu ka benefisiáriu hosi programa ne’e bá komunidade uma-kain 60-liu iha Uma-Ana-Iku.

“Ha’u rona informasaun hosi Xefe Suku Bahu, Manuel Francisco Rodrigues Gusmão kona-bá  dezentendimentu ne’e. ami haree katak kestaun falta  komunikasaun entre parte rua; Autoridade Suku Bahu ho BTL,E.P Baucau  dalaruma ladún hatene devér,  direitu no funsaun eskransaun nian  entaun ita halo asaun hanesan ne’e,” Prezidente Komisaun Ezekutivu BTL.E.P, Carlos Peloi dos Reis bá jornalista sira iha nia knaar fatin, Caicoli, Díli, Kuarta (24/01/2024).

Prezidente BTL.E.P ne’e haktuir katak  problema refére iha ona solusaun no BTL.E.P Baucau  sei servisu hamutuk ho PNDS, autóridade lokál no komunidade sira hodi haree bá interese komún ka interese povu nian.

Prezidente Komisaun ezekutivu BTL.E.P, Carlos Peloi dos Reis. Foto/Tome da Silva

“Ha’u rona  sira tuur hamutuk ona no iha ona solusaun parte kanalizasaun bee tama bá uma ne’e orsida maluk sira hosi PNDS no xefe suku sira maka sei halo, BTL sei halo dada kanu sé lasala kuatru poligadas 400 itál metrus ne’e BTL maka sei halo no BTL sei monta kontadores bá sira. Depois ha’u hanoin restu  ne’e la’o di’ak hela, horisehik, ha’u rona ita-nia reprezentante Munisípiu Baucau no sistema sira ne’e agora hadi’a tiha komunidade sira sei iha oportunidade atu uza fulan tolu gratuita, depois   ida-ne’e sira tenke kontribui tanba ida-ne’e maka ita hakarak,” Carlos Peloi dos Reis hateten.

“Ema hotu kontribui para sistema neineik iha ne’e iha sustentabilidade, ita labele defende makaas bá fundu mina-rai ne’ebé kada tinan  tohik hela, ita hotu kontribusi uituan para ita-nia fundu ne’e iis naruk uituan no  ha’u hanoin xefe suku nia preokupasaun mós loos BTL nia preokupasaun mós loos, entaun maneira implementa ne’e maka laloos. Ema hotu nia hanoin halo para komunidade sira hetan bee, ne’ebé bainhira kuandu hotu-hotu fokus bá solusaun la bele fokus bá problema no sei iha solusaun,” Carlos Peloi dos Reis tenik.

Bee-Timor-Leste.E.P iha tinan 2023 rekolla reseita hosi Munisípiu 12, la inkluí RAEOA  ho US$ 1.030.571.19, Munisípiu  Díli numeru um (1), Baucau númeru segundu (2),  Bobonaro  terseiru (3)  no Manatuto iha kuartu (4).

Jornalista Estajiária : Zita Menezes