Hatutan.com, (01 Dezembru 2021), Dili—Papa Francisco felisita Prezidente Repúblika no Povu Timor-Leste (TL) tomak ba selebrasaun Loron Proklamasaun Independénsia ba dala-46, iha 28 Novembru 2021.

Ambiente diálogu ho Prezidente Repúblika (PR), Francisco Guterres ‘Lú Olo’, ho veteranu-sira iha salaun Centro Convenção Munisípiu Baucau, Sesta (26/11/21). Foto/Média PR.

Iha karta ne’ebé hakerek ba Prezidente Repúblika iha 28 Novembru 2021, iha Sidade Vatikanu, Amu Papa Francisco hateten:

“Ba okaziaun loron Timor-Leste nian, Ha’u aprezenta ba Señor Prezidente no Povu felisitasaun cordias ho votus kresente armonia no kooperasaun ho kbiit moris nian,  dezeja futuru ida hakmatek no ksolok ba Timoroan hotu-hotu bele hetan protesaun as  ba beibeik,”.

Santo Papa iha fulan juñu 2021 konfirma nia intensaun atu vizita Timor-Leste, hato’o liuhosi nia reprezentante Santa Sé iha Timor-Leste, Monseñor Marco Sprizzi, bainhira halo audiénsia ho Prezidente Repúblika.

“Santo Padre nia vizita mai Timor-Leste depende ba evolusaun pandemia Covid-19. Tanba ne’e, ba seguransa ema hotu ninian, Amu Papa husu ba  sidadaun idaidak  simu vasina atu hotu-hotu protejidu bainhira hala’o vizita ne’e mai Timor-Leste,” Komunikadu ne’ebé fó-sai hosi Palásiu Prezidensiál Nicolau Lobato, Díli, (01/12/21).

Vizita dahuluk Santo Padre nian mai Timor-Leste akontese iha 12 Outubru 1989 iha tempu okupasaun Indonézia.

Estadu, Igreja Katòlika no sarani tomak halo esforsu hotu-hotu atu iha vizita huoi Santo Padre Francisco mai Timor-Leste ida ne’ebé ukun rasik-an ona.

Iha tinan-2015, Governu Timor-Leste asina Konkordata ho Vatikanu.

Jornalista: Rogério Cárceres