Hatutan.com, (03 Marsu 2022), Díli—Primeiru Ministru (PM) Taur Matan Ruak louva kontribuisaun veteranu sira nian ba páz no estabilidade nasionál iha kualkér situasaun.

Primeiru Ministru (PM), Taur Matan Ruak. Foto Hatutan,com.

Xefe Governu hato’o asuntu ne’e iha selebrasaun loron nasion’al veteranu ba da-lima (V) ne’ebé hala’o iha Kuartél Jenerál FALINTIL Forsa Defeza Timor Leste (F-FDTL) Fatuhada, Kinta (03/03/2022).

Primeiru Ministru mós rekoñes katak, Konstituisaun Repúblika Demokrátiku Timor Leste (K-RDTL) no lei mós husu duni atu veteranu hametin páz no estabilidade hodi garante dezenvolvimentu ekonómiku iha Timor Leste.

“Iha K-RDTL no lei sira hateten veteranu sira nia kontribuisaun atu hametin páz no estabilidade iha Timor Leste no ida seluk maka ajuda dezenvolvimentu ekonómiku iha liu hosi saida mak veteranu sira halo iha sira nia moris rasik tuir padraun ne’ebé sira iha,” Taur Matan Ruak hateten.

Advertisement

Nia mós hato’o omenajen ba erói sira ne’ebé mate no liu ona ba mundu seluk, hodi husik hela povu no nasaun ne’e moris.

Tanba ne’e, Taur espera katak sira nia klamar hetan ona moris di’ak iha ne’ebá hodi kontinua tulun povu ida ne’e iha jornada moris.

“Ha’u nia saudasaun espesiál ba ha’u nia komandante sira, ofisiais, sarjentu no soldadu sira, hamutuk ho erói sira ne’ebé sei moris, uluk fo sira nia kontribuisaun ho ita nia povu, joven sira, nasionalista no patriotista tomak ne’ebé fó kontribuisaun ba liberdade no independente,” nia hateten tán.

Oras ne’e governu liu hosi Ministériu ba Asuntu Veteranus no Kombatentes Libertasaun Nasionál sei konsentra liu ba rejistu, identifikasaun no sertifikasaun bazeia ba dadus sira ne’ebé iha, nune’e iha kombinasaun ba servisu sira ne’ebé pertense ba veteranu sira.

Alende ne’e, haree servisu nasaun nian atu Veteranu sira nia kontribuisaun ne’e mais dinámiku posível iha prosesu foun ba dezenvolvimentu ne’ebé di’ak liu.

Advertisement

Selebrasaun loron nasionál veteranu ne’e monu loos iha ámbitu kampaña eleisaun prezidensiál, nune’e governu deside hodi altera no parte gabinete PM hamutuk ho Ministru Defeza halo semináriu ba ofisiais, sarjentu no prasa sira F-FDTL inklui sira hotu ne’ebé iha posibilidade partisipa hanesan mos PNTL, hodi partilla ho membru forsa armada no defeza sira kona-bá estratejia TL nian iha funu ba libertasaun nasionál.

Iha sorin seluk, kandidatu Prezidente Repúblika Mariano Assanami Sabino Lopes ho númeru sorteiu 16, ohin laiha atividade kampaña Eleitoral, tanba loron 03 Marsu nu’udár Feriadu Nasionál ba Veteranu sira nian ne’ebé Estadu Rekoñese ona.

Atu fó Respeito no Homenagem ba loron ne’e, Mariano Assanami Sabino ba Kari ai-funan no sunu lilin iha Jardim dos Herois Metinaro Dili, vizita Rate Saudozu Prezidente Repúblika Francisco Xavier do Amaral no Saudozu Prezidente Parlamentu Nasionál Fernando La Sama de Araújo.

Jornalista: Vito Salvadór

Advertisement