Hatutan.com, (25 Abríl 2022), Díli—Governu liu hosi Ministériu Administrasaun Estatál (MAE), iha ona planu atu halo transformasaun ba lixeira Tibar hodi redúz ahi-suar ne’ebé durante ne’e fó impaktu negativu ba saúde públika liuliu ba komunidade iha área ne’e no lori mós risku ba kamada de ozôniu.

Ministru MAE, Miguel Pereira de Carvalho, hateten Governu halao ona assinatura kontratu ho empreza ida atu transforma lixeira Tibar ba iha ateru kontroladu.

Lee Mós: Lixu iha Dili, Entre Konsiénsia no Kapasidade Jestaun

Molok halo ateru ba iha lixeira Tibar, empreza sei halo mate ahi iha lixeira ne’e hodi redúz ahi-suar ne’ebé kuaze kada loron afeita ba populsaun ne’ebé hela besik.

“Lixeira Tibar ne’e kalan prodúz ahi-suar ne’ebé halai ba fatin hotu. Entaun, primeiru empreza sei ba halo mate tiha ahi, no segundu ba kee-sai tiha lixu ezisténsia sira ne’e atu bele tau lona iha okos uza sistema métodu kontroladu,” Miguel Pereira de Carvalho, hateten ba jornalista sira hafoin hasoru-malu ho Prezidente Repúblika, iha palásiu Prezidensiál, Bairru-Pité, Segunda (25/04/202).

Kontratu ne’ebé governu halo ho empreza manán na’in ba iha prosesu transformasaun lixeira Tibar ho  durasaun tinan 10, nune’e governu garante atu projetu transformasaun  lixeira ne’e bele realiza hodi redúz duni risku sira ba komunidade.

Maski la temi naran empreza, maibé nia dehan empreza ne’ebé manan projetu ne’e mós iha kualifikasaun no governu espera bele fornese servisu ida di’ak tuir kontratu ne’ebé iha.

“Ha’u la dekór empreza ne’e, por tantu hau labele fó-hatene ba ita boot sira,” nia hateten.

Oras-ne’e daudaun MAE ezekuta ona Orsamentu Jerál Estadu (OJE) 2022 ho montante millaun $102 ba trimestre dahuluk atinje ona 20%.

Tuir estimasaun MAE nian, ezekusaun sei sae bainhira Ministériu halo ona alokasaun ba konstrusaun uma kbiit laek no tinan ne’e governu sei konstrui uma kbiit laek hamutuk 4.000 iha territóriu nasionál.

Jornalista: Vito Salvadór