Hatutan.com, (16 Outubru 2021), Balibo—Laureadu Nobel ba Pás 1996 nu’udar mós Prezidente Repúblika periodu 2007-2012, José Manuel Ramos-Horta, konsidera trajédia Balibo five fó mensajen ba mundu kona-ba akontesimentu violasaun direitus umanus iha Timor-Leste.

Notísia iha Relasaun : Jornalista Na’in Tolu Manan Prémiu 2020 iha Komemorasaun Trajédia Balibo Five

Ohin loron, tuir Ramos-Horta, konstantemente ema ua’in iha mundu rona no ko’alia kona-ba problema iha Colombia, iha jornalista barak maka mate, balu iha Méxiku no la konta sira ne’ebé mate iha Síria, Irake, Líbia, Yemen no jornalista lubuk ida mak terus relasiona ho problema boot ne’ebé akontese iha Myanmar.

Maske iha fatin lubuk ida jornalista sira nafatin sai hanesan alvu atu ema halo torturasaun no viola sira nia direitu no liberdade sira, tuir Ramos-Horta, mundu nafatin fó rekoñesimentu ba servisu jornalista nian. Tinan ida-ne’e, iha jornalista senior na’in rua hanesan Dmitry Muratov husi Rúsia no Maria Ressa husi Filipina  ne’ebé sai nu’udar manan nain ba Nobel ba Pás nian.

Ramos-Horta hateten, ne’e hatudu ema nia apresiasaun no respeita ba serbisu no sakrifisiu ne’ebé jornalista sira halo atu ema seluk bele hetan liberdade no promove asuntu igualdade, redús risku ba violasaun no kontribuisaun seluk tan ne’ebé jornalista sira halo.

“Ita hamriik iha ne’e, inisiativa mai husi Conselho de Imprensa no Centro Chega! atu ita fó onra ba Jornalista sira ne’ebé mate iha akontesimentu Balibo Five no mós iha fatin seluk iha mundu tomak,” José Ramos Horta hato’o nia mensajen ne’e iha ámbitu komemorasaun trajédia Balibo Five ba dala-46 (16 Outubru 1975-16 Outubru 2021) iha Balibo, Bobonaro, Sabadu (16/10/2021).

Selebrasaun  ne’e, tuir Ramos-Horta, halai liubá Jornalista nain lima ne’ebé mate iha Balibo, la signifika haluhan povu seluk ne’ebé mós mate iha trajédia ne’e. Selebrasaun ida ne’e atu hatudu ba mundu oinsá mak Timor-Leste fó rekoñesimentu ba luta jornalista sira nian ba libertasaun nasionál.

“Laiha rai ida hanesan Timor-Leste rekoñese jornalista sira kle’an liu hanesan ita. iha Timor. Ita rekoñese ema hotu ne’ebé fó nia kontribuisaun ba luta ukun rasik an” Horta hateten.

Portantu rekoñesimentu ne’ebé halo iha Balibo hanesan inspirasaun no intensive ida ba jornalista sira ohin loron. Timor-Leste nia ukun an sura mós ho kontribuisaun jornalista estranjeiru hirak ne’ebé fó an ba mate iha sira-nia misaun.

Ho akontesimentu masakre Santa Krús, 12 Novembru 1991 hamosu opiniaun públiku iha mundu internasionál ne’ebé ikus mai lori apoiu internasionál no halo nasaun boot sira hahú preokupa ho situasaun iha Timor.

Hirak ne’e hotu, Horta fó sasin katak, tanba kontribuisaun jornalista sira-nian ne’ebé divulga mensajen kontra direitu umanu iha Timor-Leste ba mundu liuhosi orgaun komunikasaun sosiál sira.

Jornalista iha timor nia kontribuisaun ba bot tebes ba liberdade imprensa no liberdade espresaun no to’o ohin loron seidauk iha jornalista ida mak kondenadu tamba nia profisaun.

Horta tenik, besik tinan 20 ona jornalista sira hatudu sira-nia kompromisu  hodi luta ba direitus umanu no injustisa sosiál ne’e kontribui ba hamenus diskriminasaun sosiál.

“Ita hotu hatene tinan 20 ona, laiha Governu ida iha Timor mak kondena jornalista sira, lori ba prizaun Becora no Gleno ka ba iha Suai no laiha jornál ida mak taka nune’e mós televizaun no radiu,” Horta afirma.

Rai ne’e bele kiak no buat barak ne’ebé seidauk halo, maibé  tuir Horta tenke moris iha dame, domin no toleránsia tamba Estadu ne’e solidáriu no iha kbiit atu bele insentiva ema hotu tuir saida mak nia presiza.

Jornalista : Vito Salvador