Hatutan.com, (27 Novembru 2021), Dili—Prezidente Repúblika (PR), Francisco Guterres Lú Olo, iha Sábadu 27 Novembru ne’e, partisipa misa agradesimentu komemorasaun loron Proklamasaun Independénsia Repúblika Demokrátika Timor-Leste (RDTL) ba dala-46, iha Igreja Katedrál Baucau.

Prezidente Repúblika Francisco Guterres Lú Olo ho espoza Cidália Lopes Nobre Mouzinho Guterres kari ai-funan iha Ossuário Fatumaca, aldeia Waibehe-Ana, Suku Gari-Uai, Postu administrativu Baucau Vila, Munsípiu Baucau, Sábadu (27/11/21). Foto/Hatutan.com.

Hafoin misa, Xefe Estadu kontinua ba kari ai-funan iha Ossuário Baucau, iha área Fatumaca, aldeia Waibehe-Ana, Suku Gari-Uai, Postu administrativu Baucau Vila, Munsípiu Baucau, hodi fó onra no rekoñesimentu erói no martir-sira, tanba fó ona kontribuisaun ba luta libertasaun nasionál.

Notísia iha Relasaun: Produtu Lokál Enfeita Feira Nasionál 28 Novembru iha Darasula

“Ita mai ho autoridade sira hotu, sivís no militár sira, hodi tau hela ai-funan ba Ossuário ida-ne’e, tau ai-funan ba maluk sira hotu nia restu mortais. Ida-ne’e halo parte programa 28 Novembru. Ne’e sinál rekoñesimentu ba sakrifísiu boot ne’ebé sira fó ba ita nia rain, hodi hetan ita nia ukun rasik aan no liberdade,” Francisco Guterres Lú Olo hateten ba jornalista sira, hafoin kari ai-funan iha Ossuário Fatumaca, Sábadu (27/11/21).

Ho vitória Timor-Leste nian ba ukun aan ne’e, rezulta erói no aswa’in sira barak mak mate, balun família konsege hakoi, maibé balun ruin husik naklekar de’it iha fatin hotu-hotu.

“Maski funu ida ne’ebé mak halo durante tinan 24, ninia konsekuénsia ne’e sempre kona-bá Timor-Leste ne’e tomak,” PR Lú Olo, hateten.

Ministru Administrasaun Estatál (MAE), Miguel Pereira de Carvalho, dehan, iha momentu úniku hosi selebrasaun eukarístika ka misa ne’e, timoroan hotu iha onra hodi fó omenajen ba saudozu Dom Basílio do Nascimento, nu’udár Bispu disoseze Baucau, ne’e’bé nia isin haloot iha Katedrál Baucau.

“Liuhosi misa de asaun de grasas ne’ebé ohin ita hasa’e ba iha Na’in Maromak, ita hananu hamutuk ba Aman Maromak atu haraik nafatin perdaun ba ita nia asuwain, martires sira hotu nia sala. Ita harohan nafatin ba Aman Maromak, atu haraik ba sira hotu fatin di’ak iha reinu Lalehan,” Miguel Pereira de Carvaldo, dehan.

Prezidente komisaun organizadora ba komemorasaun aniversáriu Proklamasaun Independénsia RDTL ba dala-46 ne’e, hato’o agradesimentu boot ba Prezidente Repúblika Francisco Guterres Lú Olo ho espoza Cidália Lopes Nobre Mouzinho Guterres, nomós ulun boot sira hotu, Estadu RDTL nian, tantu iha nível postu administrativiu no iha nasionál, ne’ebé partisipa ona iha misa agradesimentu ne’e.

Agradese mós ba dioseze Baucau ne’ebé halo koordenasaun di’ak ho komisaun organizadóra ba komemorasaun loron proklamasaun independensia RDTL, hodi bele to’o iha faze realiza misa boot hanesan ohin.

Komemorasaun loron nasionál Proklamasaun Unilateral RDTL ba dala-46, (28 novembru 1975 to’o 2021), ho tema “a união da luta conjunta para a vitória de todos”.

Jornalista: Rogério Pereira Cárceres