Hatutan.com, (30 Novembru 2021), Díli-Primeiru Ministru (PM) Taur Matan Ruak, rekoñese investimentu iha setór infrastrutura ne’ebé halo  hetan rezultadu ne’ebé dezeja tanba problema iha definisaun prioridade  no kualidade.

Notísia iha Relasaun: PM Taur “Hirus” Komisaun Organizadora ba Semináriu Avaliasaun Projetu

Primeiru Ministru Taur Matan Ruak. Foto/Média GPM

“Iha ita-nia rain halo infrastrutura boot, infelizmente laiha  investimentu ne’ebé halo hetan rezultadu ne’ebé ita dezeja, tanba problema iha definisaun prioridade no kualidade nune’e investimentu barak ne’ebé ita halo laiha ida maka  kualidade, tanba ne’e presiza esforsu boot iha avaliasaun atu infrastrutura ne’ebé halo bele fó impaktu iha vida sidadaun tanba husi dezastre ne’ebé akontese konsege destroi infrastrutura barak, liuliu estrada hatudu katak infrastrutura ne’ebe ita halo ninia kapasidade ba rezisténsia kalamidade laiha,” Taur Matan Ruak iha ninia diskursu abertura ba semináriu rezultadu avaliasaun ex-post projetu infrastrutura iha Timor-Leste ne’ebé hala’o iha Ministériu Finansas (MF), Díli, Tersa (30/11/2021).

Nia hateten, tinan oin sei halo diskusaun kona-bá dezenvolvimentu infrastrutura hodi tau prioridade ba diskrisaun ne’ebé di’ak, tanba iha tinan ne’e, kustu ba área infrastrutura boot maibé laiha kualidade.

Taur Matan Ruak hatutan, problema hirak ne’e akontese tanba laiha komandu kontrolu ne’ebé di’ak maske Ministériu Finansa, Ministériu Obras Públiku, Ministériu Planu no Ordenamentu, iha responsabilidade boot ba projetu ne’ebé iha, maibé dala barak iha dezagregasaun no Ajénsia Nasionál Dezenvolvimentu  (ADN) ho MOP dun-malu no ikusliu Governu mak tenke responsabiliza.

Alende ne’e iha infrastrutura balun ne’ebé halo ona hanesan aeroportu Suai no auto Estrada ne’ebé halo ona, maibé ninia utilizasaun difisil liu, tanba ne’e, Taur Matan Ruak afirma tan,  iha tinan oin presiza iha diskusaun kle’an hodi mellora di’ak liu kualidade projetu iha área infrastrutura hodi gaña retornu ba kofre Estadu.

Presiza iha Manual ba Manutensaun Infrastrutura

Vise-Primeiru Ministru  no Ministru Planu Ordenamentu, José Reis hateten presiza iha manual ba manutensaun husi infrastrutura ne’ebé halo hodi obriga kada ministériu hahú halo planu manutensaun nune’e labele hein de’it to’o Estrada aat mak foin hakfodak hodi hasai kustu ne’ebé boot.

“Kona-bá manutensaun presiza iha manual hodi sai giaun ida no bele obriga ministériu sira ne’ebé aban-bain rua atu halo projetu hahú ona halo planu manutensaun, nune’e labele halo de’it projetu maibé laiha orsamentu ba manutensaun to’o aat ona mak foin hakfodak hodi hasai kustu ne’ebé boot,” José Reis afirma.

Kona-bá auto Estrada Suai, José Reis konsidera laiha estudu ne’ebé di’ak molok halo tanba objetivu husi infrastrutura bele fó impaktu ba dezenvolvimentu ekonómiku, maibé depois  halo maibé laiha manutensaun rutina no periódika no la to’o tinan aat.

Jornalista: Carmelita Isaac