Hatutan.com, (29 Dezembru 2021), Díli—Ministériu Obras Públikas (MOP), liuhosi Conselho Administraçăo do Fundo Infraestrutura (CAFI), iha Kuarta, 29 Dezembru, aprova ona konkursu kona-bá projetu foun tolu, ne’ebé tuir planu sei anunsia iha tinan 2022.

Kondisaun Estrada ne’ebé kotu iha área Postu administrative Balibo, Tersa (28/12/2021). Foto/Média Vise MOP.

Konkursu ba projetu foun tolu ne’e, ida aprezenta hosi Vise Ministru Obras Públikas (MOP), Nicolau Lino Freitas Belo, kona-bá ligasaun estrada ba kapitál Dili no Munisípiu Bobonaro, kotu iha Postu Administrativu Balibo.

Konkursu daruak, aprezenta hosi Ministru Transportes no Telekomunikasaun (MTK), José Agostinho da Silva, kona-bá konstrusaun foun ba Portu Dili, no projetu konstrusaun ba Muzeu Nasionál Rezisténsia, hato’o hosi Ministru Administrasaun Estatál (MAE), Miguel Pereira de Carvalho.

“Asuntu tolu mak ohin ita diskute iha enkontru CAFI ne’e no hetan hotu aprovasaun. Sei loke konkursu iha tinan oin,” Vise Ministru Obras Públikas (MOP), Nicolau Lino Freitas Belo, informa ba jornalista sira, iha Ministériu Ordenamentu no Territóriu, Fatuhada, Kuarta (29/12/21).

Projetu konstrusaun ba Portu Díli nian, iha Janeiru tinan 2022, sei selebra kontratu ho kompañia nasionál ida ne’ebé atu responsabiliza obra ne’e, hodi hahú implementa.

Kustu ba projetu konstrusaun ne’e, ho totál rihun $293 no, parte ministériu sei fó  apoiu supervizaun, tuir nesesidade.

IGE Normaliza Ona Estrada Balibo, Ponte Cailaco-Dilór

Governu liuhosi Ministériu Obras Públikas (MOP), orienta ona ekipa Instituto Gestăo e Equipamentos (IGE), hodi halo normalizasaun ba estrada iha Suku Leolima, Postu Administrativu Balibo, Munisipiu Bobonaro, ne’ebé kotu, kauza hosi udan boot iha 23 dezembru.

“Dadus kona-bá inundasaun iha dia 23 Dezembru, liu-liu iha Balibo, Suku Leolima, oras ne’e daudaun parte obras públikas atende ona, normaliza daudaun ona estrada ne’ebé mak kotu, rai monu hodi taka hodi halo impedimentu transporte hosi Dili ba Maliana, ita jere ona, ekipamentus IGE mós iha ne’ebá,” Nicolau hateten.

IGE mós normaliza ona ponte rua, hanesan Dilór, Postu Administrativu Lakluta, Munisipiu Viqueque, ne’ebé fronteira ho Postu Administrativu Natarbora, Muniaipiu Manatuto.

Nune’e mós, ho ponte iha Suku Bilimau, Postu Administrativu Cailaco, ne’ebé la’ós kotu, maibé hetan efeitu maka’as hosi korrente mota nian, relasiona ho udan boot mak akontese iha semana kotuk.

MOP Aloka Millaun $1.4, dezeña Ponte Loes

Kona-bá informasaun sira ne’ebé espalla iha públiku dehan, ponte Loes kotu, Nicolau hateten, informasaun ida ne’e falsa no Ministériu Obras Públika (MOP) tau ona prioridade, liu-liu halo dezeñu detalladu ba tinan 2023, ho kustu orsamentu millaun $1.4.

Orsamentu ida ne’e, sei finansia hosi emprestimu hosi The Asian Development Bank (ADB), tanba ne’e maka obras públikas sei prienxe rekezitu sira hotu ne’ebé mak ABD husu.

Jornalista: Rogério Pereira Cárceres