Hatutan.com (01 Fevereiru 2022) Díli—Xineza ne’ebé loke negósiu iha área Kampung Baru aldeia 4 de Setembru, 30 de Agostu no Moris foun, Suku Comoro, Postu Administrativu Dom Aleixo, Munisiípiu Díli, deside sobu trotoár ne’ebé antes ne’e Governu konstrui  hodi fó espasu ba ema la’o-ain, tanba halo akordu ho Autoridade lokál.

Na’in ba loja Wang Zung (WZ), iha Kampung Baru Comoro, Tersa (01/01/2022), esplika hela kona-bá razaun sobu trotoár. Foto/Hatutan.com.

Xineza sira deside sobu no taka fali (Cor) hodi kria fali fatin estasionamentu ba motór no fatin tau sasan fa’an nian, hanesan kadeira, bisikleta, armáriu, kulxaun no seluk-seluktán ne’ebé fo impaktu ba movimentu ema no transporte públiku, liu-liu kria engarafamentu iha tempu dadeer, meiu dia no kalan tanba laiha espasu ba ema atu la’o-ain.

“Ami iha akordu autorizasaun ho xefe suku Comoro. Maibé, xefe suku mak kaer karta ne’e no iha ami laiha. Iha momentu sobu trotoár no cor fali ne’e hosi parte MOP no ADN mai iha ne’e ho karreta ida inklui xefe suku rasik mak hetan autorizasaun hodi sobu,” Traballadór iha loja Xineza Wang Zung (WZ), Cristovão Ximenes hateten ba Hatutan.com iha ninia loja Comoro, Tersa (01/01/2022).

Bainhira Hatutan.com halo konfirmasaun ho Xefe Suku Comoro, Eurico da Costa kona-bá asuntu ne’e, nia parte rezeita katak, la fó autorizasaun, tanba nia halo de’it pedidu no loja-na’in mak lori ba hatama iha Diresaun Nasional das Estradas, Pontes e Controlo de Cheias, Ministériu Obras Públika (MOP).

Xefe Suku Comoro, Eurico da Costa. Foto/Hatutan.com.

“Loja na’in mai husu atu hasai trotoár hodi cor fali. Tanba ne’e, ha’u halo de’it pedidu no sira na’in mak ba hatama iha MOP hodi hetan autorizasaun. Tanba ne’e, la’ós Xefe Suku mak autoriza, maibé hanesan pengantar de’it. Nune’e, pedidu ne’ebé mak ha’u halo barak liu hosi suku Comoro aldeia 4 de Setembru iha loja Xinéz ualu, aldeia 30 de Agosto iha 20-resin no aldeia Moris foun iha loja 10-resin, ne’ebé maioria ema Xineza de’it,” Xefe Suku Eurico da Costa, hateten.

Xefe Suku ne’e mós rejeita katak, nia parte hetan pursentu hosi negósiu ne’ebé Xineza sira halo liu-liu kona-bá autorizasaun sobu trotoár, tanba laiha diploma ministeriál ida ne’ebé bele kobra osan hosi atividade negósiu.

Parte Autoridade lokál mós laiha dadus serteza kona-bá totál pedidu ne’ebé hasai ona ba Xineza sira hodi hetan autorizasaun hosi MOP  atu sobu trotoár, tanba autorizasaun ne’e deside hosi parte MOP rasik la’ós hosi xefe suku.

Ambiente loja Wang Zung (WZ), iha Kampung Baru Comoro, Tersa (01/01/2022).Foto/Hatutan.com.

Iha Sesta, 28 Janeiru 2022, Hatutan.com, tenta halo konfirmasaun ba asuntu ne’e ho Ministériu do Plano e Ordenamento (MPO), liuhosi Diretór Ajénsia Dezenvolvimentu Nasionál (AND), Domingos de Jesus Sequeira, ne’ebé esplika katak servisu ne’e tutela ba iha Ministériu das Obras Públicas (MOP), liuhosi Direcção Nacional das Edificações, tanba Ajénsia Dezenvolvimentu Nasionál (AND) ninia kompeténsia mak atu halo de’it monitorizasaun no sertifikasaun ba projetu sira ne’ebé eziste.

Bainhira Hatutan.com, halo fali konfirmasaun asuntu ne’e ho parte MOP, liuhosi diretór Direcção Nacional das Edificações, informa tán katak, ninia kna’ar mak atu halo de’it kontrollu ba sidadaun sira ne’ebé hatama pedidu atu halo konstrusaun ba edifísiu públiku no privádu sira.

Diretór ne’e, sujere atu Hatutan.com, bele konfirma fali asuntu ne’e ho Direcção Nacional das Estradas, Pontes e Controlo de Cheias (DNEPCC).

Hatutan.com, kontinua halo esforsu hodi konfirma asuntu ne’e, ho Direcção Nacional das Estradas, Pontes e Controlo de Cheias (DNEPCC), liuhosi departamentu Manutensaun, maibé labele halo komentáriu ka fó informasaun ruma kona-bá asuntu ne’e, tanba laiha despaixu ka autorizasaun ruma hosi sira nia superiór (Ministru ho Diretór).

Jornalista: Carmelita/Rogér