Hatutan.com, (01 Marsu 2022), Dili-Ministériu Públiku (MP) liu husi Prokuradór titulár Rogério Viegas, notifika ona Francisco Kalbuadi Lay ba akuzasaun ne’ebé MP prodús ona liuhusi prosesu investigasaun tanba deskonfia komete krime brankamentu kapitál.

Notísia iha Relasaun: Francisco Kalbuadi iha Ona TL Hodi Partisipa Kongresu FFTL

Francisco Kalbuadi Lay partisipa iha kongresu Federasaun Foteból Timo-Leste (FFTL), 26 Fevereiru 2022. Foto/Hatutan.com

“Ha’u nia kliente simu ona notifikasaun husi MP iha loron 25 fulan-Fevereiru 2022 husi Prokuradór titulár Rogério Viegas, signifika akuzasaun prodús hotu ona maka sira notifika ne’e, maibé depois  ida-ne’e sei rejistu iha TDD hodi konklui ba juis administradór hodi halo distribuisaun ba juiz prosesu hodi marka loron julgamentu,” Defensor Públiku husi Francisco Kalbuadi Lay, Fernando de Carvalho, konfirma ba Hatutan.com, iha TDD, Tersa (01/3/2022).

Bainhira MP notifika ona signifika prosesu investigasaun remata ona no prodús ona akuzasaun hodi submete ba TDD.

Defeza ne’e hateten maske nia kliente simu ona notifikasaun husi MP, maibé nafatin bele sai ba rai-li’ur bainhira hetan autorizasaun husi MP.

“Antes ne’e ha’u-nia kliente hetan ona medida koasaun TIR no proibisaun ba auzénsia, maibé nia sei bele sai ba rai-li’ur bainhira iha autorizasaun no bainhira atu kaptura ka la kaptura ne’e kompeténsia TDD nian hodi foti desizaun la’ós ema seluk,”  Fernando Carvalho hateten.

Informasaun seluk ne’ebé Hatutan.com simu husi ofisial justisa iha TDD katak prosesu ka akuzasaun husi Francisco Kalbuadi Lay seidauk tama iha sistema, maibé bainhira tama ona maka sei rejistu hodi konklui ba juis administradór hodi halo distribuisaun ba juis prosesu.

Jornalista: Carmelita Isaac