Hatutan.com, (28 Marsu 2022), Díli—Durante oras 24 nia laran, husi Domingu-Segunda (27-28/03/2022), tuku 17:00 Otl, Comissão Nacional de Eleições (CNE) fó tempu ba kandidatu Prezidente Repúblika ho nia ekipa susesu sira atu halo reklamasaun. Maibé, laiha kandidatu ida maka halo reklamasaun tanba ne’e,  CNE entrega ona rezultadu apuramentu nasionál ba Tribunal Rekursu (TR).

Notísia iha Relasaun: CNE Fó Oras 24 ba Reklamasaun

Prezidente CNE, José C. Belo Perreira. Foto/Hatutan.com.

“Depois  rezultadu fó sai, iha tempu legal oras 24 ba kandidatu PR sira ho sira-nia ekipa susesu atu  hatama reklamasaun ka kontestasaun, maibé laiha reklamasaun tanba ne’e CNE entrega ba TR hodi valida no foti desizaun ba rezultadu apuramentu refere,” Prezidente CNE, José Agostinho da Costa Belo, hateten ba jornalista sira hafoin submete rezultadu apuramentu nasionál ba TR iha Caicoli, Dili, Segunda (28/03/2022).

Tuir lei eleitorál, iha oras 72 ba TR hodi pronunsia no valida akta rezultadu apuramentu nasionál refere tuir kompeténsia no desizaun TR karik iha Segunda volta ka lae.

Rezultadu apuramentu nasionál ne’ebé Hatutan.com sita husi  CNE hahú hosi kandidatu ne’ebé hetan votu barak liu to’o ida ne’ebé hetan votu uitoan liu, maka hanesan tuir mai ne’e;

1. Okupa hosi Kandidatu José Ramos Horta ho númeru sorteiu 14, hetan votu 303.477 ho (46,6%).
2. Kandidatu Francisco Guterres Lú Olo ho númeru sorteiru 6, hetan votu 144.282 (22,1%).
3. Kandidata Armanda Berta dos Santos ho númeru sorteiu 9 hetan votu 56.690 (8,7%).
4. Lere Anan Timur ho númeru sorteiu 8, hetan votu 49.314 (7,6%).
5. Mariano Assanami Sabino ho númeru sorteiu 4, hetan votu 47.334 (7,3%).
6. Ancleto Ferreira Bento ho númeru sorteiu 5, hetan votu 13.205 (2,0%).
7. Martinho Germano da Silva Gusmão ho númeru sorteiu 13, hetan votu 8.598 (1,3%).
8. Hermes da Rosa Correia Barros ho númeru sorteiu 2, hetan votu 8.030 (1,2%).
9. Milena Pires ho númeru sorteiu 7, hetan votu 5.430 (0,8%).
10. Isabel da Costa Ferreira ho númeru sorteiu 1, hetan votu 4.219  (0,6%).
11. Felizberto Araújo Duarte ho númeru sorteiu 15, hetan votu 2.709 (0,4%).
12. Constâncio Pinto ho númeru sorteiu 11, hetan votu 2.520 (0,4%).
13. Rogério Tiago de Fatima Lobato ho númeru sorteiu 4, hetan votu 2.058 (0,3%).
14. Virgílio Guterres ho númeru sorteiu 12, hetan votu 1.720 (0,3%).
15. Antero Bendito da Silva ho númeru sorteiu 10, hetan votu 1.562 (0,2%).
16. Ángela Freitas ho númeru sorteiu 3 hetan votu 711 (0,1%).

Apuramentu CNE nian totál votante iha eleisaun Prezidensiál 2022 na’in- 664.106 ho total votu válidu 651.859  (98,16%), votu nulu 8.386 (1,26%), branku 3.743 (0,56%), rejeitadu 65 (0,1%) no reklamadu 0.

Jornalista: Carmelita Isaac