Hatutan.com, (22 Juñu 2022), Díli- Prezidente Repúblika (PR), José Manuel Ramos-Horta, husu bá Konfederasaun Desportiva Timor Leste (CDTL, sigla portugés) kontinua servisu hamutuk ho federasaun desportivas afiliadas sira atu promove modalidade desportu iha Timor-Leste bá mundu.

Lee Mós : Partisipa Sea Games 2022, CDTL Sei Rigór iha Selesaun

Vise-prezidente no prezidente interinu CDTL, Inocéncio Araújo da Silva, hafoin hasoru malu ho Prezidente Repúblika, José Manuel Ramos-Horta, iha Palásiu prezidensiál, Kuarta (22/06/2022) . Foto/Hatutan.com

Vise-prezidente no prezidente interinu CDTL, Inocéncio Araújo da Silva, hafoin hasoru malu ho Prezidente Repúblika, José Manuel Ramos-Horta, iha Palásiu prezidensiál, Kuarta (22/06/2022) hateten, CDTL hasoru PR hodi informa prosesu sira ne’ebé lao iha rai-laran liga ho servisu CDTL nian hamutuk ho federasaun desportu afiliado sira bá dezenvolvimentu desportu iha Timor-Leste.

Xefe Estadu komprometidu atu nafatin tau matan bá CDTL no federasaun desportu afiliado sira no sei ko’alia ho Governu oinsá maximiza atensaun bá federasaun desportu sira liu husi CDTL atu bele hadi’a kualidade no mellora prestasaun federasaun desportu sira nian.

CDTL iha ona membru afiliado husi federasaun desportu hamutuk 35 no husi membru sira ne’e maioria hetan ona lisensa husi ministériu justisa bá sira-nia atividade no iha federasaun lubuk ida ne’ebé mós halo ona afiliasaun bá federasaun internasionál no kada tinan sempre bá tuir eventu internasionál  rejionál sira hodi reprezenta Timor-Leste.

Maioria husi federasaun rejistradu ne’ebé hola parte iha CDTL nia mahon sei enfrenta difikuldade liuliu liga ho rekursu umanu no mós fatin tamba ne’e CDTL oras ne’e forma ona ekipa hodi halo diagnostika bá funsionamentu administrasaun, operasionál hotu iha federasaun sira hotu ne’ebé hamahon na iha CDTL atu bele hatene no identifika difikuldade no problema ne’ebé kada federasaun enfrenta.

CDTL sei la fó oportunidade bá grupu ka indivíduu ne’ebé mai ho interesse pesoál hakarak buka priviléjiu no goza rekursu sira ne’ebé federasaun iha.

Jornalista: Vito Salvador