Hatutan.com, (12 Agostu 2022), Díli-Governu Timor-Leste (TL) reprezenta hosi Ministru Justisa (MJ), Tiago Amaral Sarmento ho Enkarregadu Negósiu Estranjeiru  Estadus Unidus Amerika (EUA), Tom Daley, Sesta (12/08/202), asina akordu implementasaun prinsípiu resiprosidade liuhosi akordu arrendamentu rai no uma ne’ebé nasaun rua ne’e utiliza bá idak-idak nia embaixada.

Lee Mós : Povu EUA Apoia Tan ICU Movel Ida Mai Timor-Leste

Ministru Justisa (MJ), Tiago Amaral Sarmento ho Enkarregadu Negósiu Estranjeiru  Estadus Unidus Amerika (EUA), Tom Daley, asina akordu implementasaun prinsípiu resiprosidade iha salaun MNEK, Díli, Sesta (12/8/2022). Foto/Espesiál

Ministra Négosiu Estranjeiru no Kooperasaun (MNEK), Adaljiza Magno nu’udár sasin prinsipál iha  serimonia asinatura akordu ne’ebé hala’o iha Salaun Ministériu Negosiu Estranjeiru no Kooperasaun Timor-Leste.

Akordu refere ho konteúdu katak hosi EUA fó rai no uma rua ne’ebé prontu utiliza bá TL iha Washington no Nova Yorke hodi utiliza bá TL ninia embaixada, nune’e mós TL oferese rai no uma bá EUA ninia embaixada iha TL ho gratuita durante períodu tinan 50 no sei extende tinan 50. 

“Ohin marka istória bá dahuluk aplika prinsípiu resiprosidade ho  EUA hafoin Timor Leste restaura nia independénsia iha 20 fulan-Maiu 2002, tanba liuhosi negosiasaun durante tinan hitu maka ohin formaliza ho akordu, nune’e parte rua sei la selu arrendamentu rai no uma ne’ebé uza,” Ministru Justisa, Tiago Amaral Sarmento bá jornalista sira, hafoin asina akordu iha ho EUA.

Medida rai no uma ne’ebé nasaun rua ne’e oferese  bá malu hodi utiliza ba idak-idak nia embaixada kuaze hanesan tanba TL fó bá EUA kuaze ektare rua no EUA fó ba TL rai ho uma rua; ida iha Washington no ida Nova Yorke ne’ebé lokaliza iha sentru.

Enkarregadu Negósiu EUA iha TL, Tom Daley kontente loos  ho akordu implementasaun prinsípiu resiprosidade ne’e tanba hosi akordu ne’e hatudu EUA nia kompromisu forte iha relasaun amizade ho Timor-Leste.

“Ha’u laiha serteza kona-bá medida rai no uma ne’ebé EUA fó bá Embaixada TL uza iha Washington no Nova Yorke, maibé atu hateten de’it valor rai ne’ebé iha hanesan de’it ho ida ne’ebé TL fó ba EUA iha Díli,” Tom Daley hateten.

Hafoin asina akordu ne’ebé Ministra Negósiu Estranjeiru no Kooperasaun Timor-Leste, Adaljiza Magno mós hanesan testemuña hatudu katak parte rua bele utiliza ona rai no uma bá idak-idak nia embaixada no parte rua sei la selu arrendamentu.

Jornalista : Carmelita Isaac