Hatutan.com, (20 Fevereiru 2023), Díli- Assalam Fc no Emanuel FC sei harame  Estádiu Munisipál Díli hafoin ekipa rua sei hasoru malu iha jogu kontinuasaun bá Jornada dahuluk Liga Timorense époka 2022-2023 iha Tersa,  21 fulan-Feverertu 2023.

Lee Mós : Abertura Liga Timorense Époka 2022-2023, Aitana FC Manán Porto Taibessi FC Ho Skore 2-1

Konferénsia imprensa Assalam Fc vs Emanuel Fc. Foto/LFTL

Ekipa Assalam Fc ne’ebé mai ho kompozisaun jogadór mistura hosi estranjeiru no nasionál garante sei rekolla pontu tolu atu asegura dalan bá kampiaun Liga Époka ne’e.

Treinadór Assalam Fc, Gaspar Amaral liuhosi konferénsia bá imprensa iha estádiu Munisipál Díli, Segunda (20/02/2023), hateten kona-bá preparasaun ne’ebé Assalam Fc halo bele dehan katak mínimu tebe-tebes, maibé Assalam Fc preparadu hela bá jogu kontra Emanuel Fc no jogu sira iha liga Timorense époka 2022-2023.

“Ha’u fiar katak ami nia ekipa Assalam Fc sei hatudu jogu ida di’ak no kompete ho di’ak,” hateten Gaspar Amaral.

Treinadór ne’e hatutan, Jogadór Assalam Fc hotu-hotu iha kondisaun ida di’ak, no prontu atu joga maske iha Jogadór ida  ka rua mak sofre hela aleija maibé garante sira sei hamutuk ho ekipa ba jogu tuir mai.

Atu maximiza kompozisaun Jogadór iha kada liña ne’ebé iha, Assalam Fc halo mós kontratu ho Jogadór hosi nasaun li’ur hodi garante manan Emanuel Fc iha jogu dahuluk atu sai hanesan motivasaun bá jogu sira tuir mai kontra ekipa sira seluk no asegura vitória ba kampiaun Liga Époka ne’e.

Nia informa Assalam Fc kontrata Jogadór estranjeiru hamutuk na’in-neen hosi  Ghana iha Jogadór na’in-tolu, Indonézia na’in-rua no ida hosi Kanada.

Treinadór Emanuel Fc, Emiliano da Silva hateten, hotu-hotu hatene katak kompetisaun liga Timorense époka 2022-2023 ho durasaun ne’ebé mak badak tamba kada ekipa sei hasoru malu dala ida de’it, tamba ne’e ekipa Emanuel Fc preparadu ona atu enfrenta jogu sira iha époka ne’e.

“Kona-bá jogu aban nian hasoru Assalam Fc, ami preparadu, ami hatene katak ekipa Assalam Fc, ekipa ida ne’ebé boot, ekipa ne’ebé kleur ona iha primeira divizaun tamba ne’e estratéjia saida mak ami prepara hasoru sira ami halo ona no ami prontu aban iha kampu,” hateten Emiliano da Silva.

Treinadór ne’e hatutan, ekipa Emanuel Fc laiha mudansa bá Jogadór tamba maioria Jogadór ne’ebé reforsa ekipa Emanuel Fc mai huosi Jogadór nasionál sira ne’ebé lori ekipa Emanuel Fc promovidu husi segunda divizaun époka kotuk, tamba ne’e garante katak Jogadór sira sei iha espíritu ida servisu hanesan ekipa atu hetan vitória.

Treinadór ne’e subliña ekipa Emanuel Fc sei laiha Jogadór estranjeiru tamba nia iha ambisaun hakarak promove Jogadór nasionál hamutuk ho Emanuel Fc ,atu nune’e, hatudu kualidade Jogadór lokal ne’ebé Timor-Leste iha.

“Ho matéria ida ne’ebé mak ha’u prepara ona hamutuk ho Jogadór Emanuel Fc sira durante treinu, ha’u garante ami preparadu atu kompete ho ekipa bo’ot sira iha primeira divizaun liga Timorense époka 2022-2023,” nia tenik.

Eis Jogadór selesaun nasional ne’ebé koñesidu ho naran estimadu Ary ne’e informa katak Emanuel Fc laiha ambisaun atu sai kampiaun, maibé koko para atu hatudu jogu ida di’ak no mantein iha primeira divizaun bá époka sira tuir mai.

Jornalista: Vito Salvadór