Hatutan.com, (31 Marsu 2023), Díli-Administradór hosi Estadus Unidus nia Ajénsia bá Dezenvolvimentu Internasionál (USAID, sigla ingles), Samantha Power anunsia katak Timor-Leste selesiona nu’udár nasaun parseiru ida entre sia (9) bá inisiativa Parseria bá Dezenvolvimentu Demokrátiku (PDD, sigla ingles) durante loron dahuluk iha Simeira bá Demokrasia 2023.

Lee Mós : Estadus Unidus Fornese Fini Fundu bá Feto Timoroan Emprendedora Foun sira

Prezidente Repúblika, José Ramos-Horta. Foto/Espesiál

Komunikadu imprensa ne’ebé Hatutan.com asesu, Sesta (31/3/2023), relata katak  selesaun ida-ne’e reflete Estadus Unidus nia rekoñesimentu bá Timor-Leste nia progresu demokrátiku ne’ebé sustentavel no kompromisu bá valór demokrátiku sira.

“Ha’u haksolok tebes hodi anunsia nasaun sia (9) dahuluk hirak ne’e: Malawi, Zámbia, Nepál, Timor-Leste, Arménia, Masedónia Norte, Ekuadór, Paraguai, no Repúblika Domínika,”  USAID nia Administradór Samantha Power hateten. “Nasaun hirak ne’e iha poténsia boot hodi haforsa sira nia demokrasia – no USAID kompromete ona atu hala’o parseria ho sira hodi realiza vizaun ne’e.”

Liuhosi Parseria bá Dezenvolvimentu Demokrátiku (PDD), USAID buka atu amplifika ho haforsa progresu hirak ne’ebé mak Timor-Leste halo ona liuhosi hakle’an apoia bá dezenvolvimentu demokrátiku. PDD sei utiliza prosesu demokrátiku inkluzivu ne’ebé lidera lokalmente hodi identifika no responde bá dezafiu dezenvolvimentu prinsipál sira ne’ebé, bainhira la hetan responde ba ida ne’e, bele hatún sira-nia dezenvolvimentu demokrátiku.

Atu halo ida-ne’e, PDD ne’e sei tau hamutuk parte interesada oioin hamutuk iha Governu, sosiedade sivíl, no setór privadu. Liuhosi aproximasaun ida-ne’e, PDD sei fó lian bà autór lubun boot ida ne’ebé barak liu no tulun asegura katak demokrasia la’o iha rai refere nia laran. 

Prezidente Repúblika, José Ramos-Horta virtualmente hamutuk ho lider mundiál sira seluk iha Simeira bá Demokrasia ida-ne’e nu’udar oradór konvidadu ida hodi ko’alia bá sesaun plenária ne’ebé transmite direta.

Estadus Unidus lansa Simeira bá Demokrasia dahuluk iha inísiu tinan 2021 hodi tau fokus foun no iha nivel-aas bá nesesidade haforsa instituisaun demokrátiku sira, proteje direitus umanus, no aselera luta kontra korrupsaun, tantu iha rai-laran no mós rai-li’ur Prezidente Ramos-Horta nia vídiu mensajen nasionál mós loke no hatudu ona bá iha sesaun tolu ne’ebé diferente iha Siméira hodi hatán bá Reforma Demokrátiku, Kreximentu Ekonomia, no Prosperidade Komún.

“Ami hetan ona pedidu atu demonstra ka hatudu ba ami nia povu katak bele distribui ka fó demokrasia ba sira nia nesesidade, proteje sira ho seguru no fó dalan ba sira hodi atinje ba sira nia aspirasaun. Ha’u orgullu tebes mai iha ne’e ohin hodi fahe informasaun balu kona-ba Timor-Leste, nu’udar nasaun foin-sa’e ida entre sira seluk maibé orgullu tebes ho nia demokrasia, konsege atinje ona,”  Prezidente José Ramos-Horta hateten.

Governu Estadus Unidus nu’udár Timor-Leste nia parseiru bá tempu naruk, fó apoia ne’ebé signifikante bá nasaun ne’e nia esforsu ba dezenvolvimentu, liuliu iha área saúde, edukasaun, no kreximentu ekonomia.

 Governu EUA nia selesaun ba Timor-Leste nu’udar nasaun PDD ida sai hanesan testemuña ba valór demokrátiku ne’ebé fahe hamutuk ba-malu ne’ebé hametin liután parseria entre EUA – Timor-Leste.

Jornalista : Vito Salvadór