Hatutan.com, (28 Abríl 2023), Díli– Entre tinan 2020 to’o iha fulan-Abríl 2023, Oitavu Governu Konstitusionál konsege halo poupansa osan billaun $1,5 bá levantamentu osan husi Fundu mina-rai hosi totál montante billaun $5,2 ne’ebé mak Parlamentu Nasionál aprova ona durante tinan-4 ikus ne’e.

Lee Mós : Banku Mundiál: Timor-Leste Nia Kreximentu PIB Atrazu iha Nivel Rejionál

Foto/Ministériu Finansas

Sita hosi konta ofisial Facebook Gabinete do Ministro das Finanças, Rui Augusto Gomes, haktuir katak iha tinan 2020, Parlamentu Nasionál aprova levantamentu osan hosi Fundu Mina-rai ho montante millaun $964 no Governu halo de’it levantamentu millaun $886  ka 92%.

Iha 2021, Parlamentu Nasionál aprova levantamentu osan husi Fundu Mina-rai ho montante billaun $1,378  no Governu foti de’it billaun $1,148 ka 83%.

Tinan kotuk, Parlamentu Nasionál aprova levantamentu osan husi Fundu Mina-rai ho montante billaun $1,553 no Governu foti de’it  billaun $1,404 ka 90%.

Iha tinan ida-ne’e, Parlamentu Nasionál aprova levantamentu osan hosi Fundu Mina-rai ho montante billaun $1,346 no to’o iha fulan-Abríl 2023, Governu foin mak foti de’it millaun $300 ka 22%. Nune’e, husi tinan 2020 to’o Abríl 2023, Oitavu Governu Konstitusionál liuhusi Ministériu Finansas, halo ona levantamentu osan husi Fundu Mina-rai ho montante totál billaun $3,7 husi montante billaun $5,2 ne’ebé mak Parlamentu Nasionál aprova ona – iha poupansa kuaze billaun $1,5 entre levantamentu aprovadu hosi Parlamentu Nasional (billaun $5,2) no levantamentu atuál (billaun $3,7).

Poupansa ida-ne’e akontese tambá Ministériu Finansas aplika jestaun fluxu kaixa (cash flow) ne’ebé bainhira iha nesesidade atu halo reforsu ba kaixa Estadu mak Governu foin hato’o pedidu levantamentu osan ba Banku Sentrál Timor-Leste. Se laiha nesesidade, Governu sei la-halo levantamentu.

Tuir relatóriu ikus husi Banku Sentrál Timor-Leste, to’o iha 31 Dezembru 2022, balansu Fundu Mina-rai hamutuk billaun $17,4.

Jornalista : Vito Salvadór