Hatutan.com, (21 Jullu 2023), Baucau—Prezidente Repúblika (PR), José Ramos-Horta, iha nia lia menon bá Bispu foun Dioseze Baucau, Dom Leandro Maria Alves ho sarani timoroan hotu iha Dioseze Baucau, atu hamutuk hametin misaun evanjelizasaun, kontínua    hametin kultura no identidade nasionál, kontínua hametin rekonsiliasaun ho dame, fraternidade umana, igualdade jéneru, feto ho mane direitu hanesan, hadomi oan sira defisiénsia ho nesesidade espesiál, kontínua formasaun edukasaun formal, étika, ho umanista no kontínua  formasaun iha siénsia.

Lee Mós : Dom Leandro Maria Alves Hakarak Sai Símbolu Unidade no Sinodalidade

PR Ramos-Horta hadi’a tais ne’ebé sarani Baucau kahe bá Dom Leandro Maria Alves, Sesta (21/07/2023). Foto/Elio dos Santos da Costa

Iha nia mensajen misa ordenasaun episkopál Dom Leandro Maria Alves nian ne’ebé hala’o iha Igreja Katedrál Santu António Baucau, Sesta (21/07/2023), Xefe Estadu Timor Leste ne’e hateten,   Igreja Katólika mak kontribui iha tinan atus bá atus formasaun timor nia istória relijiaun omojénea, identidade, kultura, dignidade Timor-Leste nian iha mundu.

Ramos-Horta hateten, Prezidente Repúblika  kontínua nia misaun hakerek iha Konstituisaun RDTL, hametin unidade, dame, rekonsiliasaun, promove polítika, edukasaun, saúde ne’ebé di’ak atu hamate situasaun ki’ak iha rai-laran.

Prezidente José Ramos-Horta fó omenajen mós bá Maktoban Bispu Basílio do Nascimento ho Bispu Martinho Lopes ho sira hotu ne’ebé la hamutuk ho timoroan sira  iha loron ohin tanba sira hakat ona bá reinu seluk.

“Sarani sira hotu, iha rai-laran no mós rai-li’ur, ita alin sira Musulmanu no mós Protestante, ita hamutuk simu Amu Leandro Maria Alves nu’udár Bispu Dioseze Baucau nian. Todan ne’e tula iha Amu-bispu Leandro Maria Alves nia kabas, todan ne’e sei sai kaman bainhira  ita lori hamutuk todan ne’e,” José Ramos-Horta hateten.

Ramos-Horta tenik dehan, Estadu eziste atu serbí povu, igreja eziste atu serbí povu. Dala ida tan, Horta dehan,  parabéns ba povu Timor-Leste tomak, parabéns bá povu Baucau ne’ebé  hetan oan ida  atu serbí nu’udar Bispu Dioseze Baucau.

Jornalista : Elio dos Santos da Costa