Hatutan.com, (11 Agostu 2023), Díli—Prezidente Repúblika (PR), José Ramos-Horta iha mehi hakarak atu Rádiu Televizaun Timor Leste, Empreza Públika (RTTL,E.P), sai hanesan instrumentu bá diplomasia, liu hosi ninia publikasaun notiísia lorloron ho Lian haat hanesan Lian Tetum, Portugés, Inglés no Bahasa Indonézia.

Xefe Estadu hato’o asuntu ne’e iha ámbitu serimónia asinatura interkámbiu entre Programa Nasoens Unidas bá Dezenvolvimentu (PNUD) ho Governu Japaun nian ho millaun $6 bá haforsa kapasidade operasionál RTTL,EP ne’ebé hala’o iha Kofi Annan Room, UN House Caicoli, Sesta (11/08/2023).

Lee Mós: SEKOMS ho Ekipa Tékniku Sei Haree Fali Projetu Harii Torre Tolu ho Konstrusaun Edifísiu RTTL,E.P

“Ha’u nia mehi mak ida-ne’e, RTTL,EP tenke halo Broadcasting ba língua haat hanesan lian Tetum, Bahasa Indonesia, Portugés no Inglés. Tenke sai hanesan instrumentu diplomasia, entaun kuandu Televizaun iha rai laran di’ak ema hosi liur komesa haree,” Ramos-Horta hateten.

Ramos-Horta konsidera Televizaun importante ba rai laran, hodi promove unidade nasionál, fó informasaun permanente atu hamenus informasaun falsa sira labele domina. Ne’e duni ba Televizaun publika tenke badinas no iha kreativu barak.

“Ha’u agradese kle’an ba Governu Japaun ne’ebé kontinua parseria ho Timor Leste. Ne’e importante tebes iha área barak hahú kedan iha 1999 to’o ohin loron. Tanba ne’e agradese bá Governu Japaun no mós UNDP,” nia agradese.

Xefe Estadu ne’e mós iha esperansa katak, RTTL,EP bele dezenvolve an to’o hetan nia kualidade hanesan Televizaun balun iha rejiaun Indonézia, Singapura no sira seluk tán.

Tanba ne’e nia rekoñese katak, atu to’o iha ne’ebá infraestrutura no ekipamentu ba jornalista sira tenke iha duni.

Nia husu Governu labale politiza no labele buka atu sempre interfere hodi nomeia ida-ne’e, nomeia ida ne’ebá, tenke ema hosi kor ida-ne’e no kor ida ne’ebá, lebele halo ida-ne’e tenke tau ema ne’ebé iha duni kualidade di’ak atu bele dezenvolve televizaun ida ne’e.

Jornalista Estajiariu: Lazaro Pereira Quefi