Hatutan.com, (16 Marsu 2023), Díli—Prezidente Repúblika (PR), José Ramos-Horta fó kondekorasaun medalla Timor-Leste (TL) ba atleta Ski Yohan Goutt Gonçalves ne’ebé sempre hamorin Timor-Leste nia naran iha mundu liu husi modalidade desportu ne’e.

Prezidente Repúblika (PR), José Ramos-Horta fó kondekorasaun medalla Timor-Leste (TL) ba atleta Ski Yohan Goutt Gonçalves ne’ebé sempre hamorin Timor-Leste nia naran iha mundu liu husi modalidade desportu ne’e. Kondekorasaun ne’e oferese iha Palásiu Prezidensiál Nicolau Lobato Bairr-Pité, Kinta (16/03/2023). Foto/Média PR.

Atleta Ski Timor-Leste Yohan Goutt Gonçalves hanesan jerasaun Timoroan ne’ebé hela iha nasaun França no sai hanesan atleta ski profesionál ne’ebé sempre tuir eventu kurida ski internasionál iha olimpiade no rejista hanesan atleta ski hosi Federasaun Ski Timor-Leste no sempre hamorin naran Timor-Leste liu hosi lori bandeira RDTL na dada iha eventu sira ne’ebé atleta ne’e partisipa.

Lee Mós: Yohan Gonçalves Orgullu Reprezenta TL iha Jogu Winter Olimpic Xina

Prezidente Repúblika, José Ramos-Horta hateten, Yohan Goutt Gonçalves desde joven dedika an ba desportu liu-liu iha modalidade ski ne’ebé ema halo iha jellu ka invernu iha Europa ne’ebá no iha fatin sira seluk ne’ebé jellu iha.

Kompetisaun ski hanesan modalidade desportu ida ne’ebé atrativu no kapas loos no Yohan Goutt Gonçalves rasik partisipa ona iha kompetisaun internasionál barak no sempre hamorin naran Timor-Leste nian iha eventu sira ne’ebé nia partisipa.

“Ohin ita fó kondekorasaun medalla Timor-Leste nian ba nia, ita nia agradesimentu ba Yohan Goutt Gonçalves hanesan Timor-Leste nia diplomata no Embaixadór boa vontade iha mundu internasionál liu husi desportu ski,” Ramos-Horta hateten iha Palásiu Prezidensiál Nicolau Lobato Bairr-Pité, Kinta (16/03/2023).

Xefe Estadu fó kondekorasaun no rekonesimentu sira ne’e atu motiva sidadaun sira no Prezidénsia Repúblika sempre apoia modalidade desportu sira seluk hodi fasilita mós atu ba partisipa iha eventu sira hanesan foin dadaun Prezidénsia Repúblika fasilita ekipa Taekwondo ba partisipa jogu sira iha Kupang Nusa Tenggara Timur Indonézia no kuaze manan medalla hotu iha eventu ne’e.

Nune’e mós atleta Ski Yohan Goutt Gonçalves orgullu tanba hanesan atleta Ski  sempre reprezenta Timor-Leste iha jogu olímpiku sira.

“Ha’u Orgullu reprezenta Timor-Leste ne’ebé hanesan nasaun orijen ha’u nia mãe nian no orgullu lori bandeira Timor-Leste kompete iha eventu sira ne’ebé iha,” Yohan Goutt Gonçalves hateten ho kontente.

Orgullu mós ho kondekorasaun ne’ebé Estadu fó, obrigadu ba Prezidente Repúblika no nia promete sei kontinua lori misaun atu haforsa desportu ski iha Timor-Leste no sei nafatin reprezenta Timor-Leste iha eventu sira tuir mai.

Sekretáriu Estadu Juventude no Desportu (SEJD), Abrão Saldanha hateten, atleta Ski Timor-Leste Yohan Goutt Gonçalves merese ba kondekorasaun hosi Estadu Timor-Leste tanba nia hanesan úniku atleta hosi Timor-Leste ne’ebé bele tuir kompetisaun Winter Olympic tanba iha iha kualifikasaun rasik por méritu la’ós ba tanba hetan konvite.

Sekretáriu Estadu ne’e hatutan, iha partisipasaun ikus atleta ski Timor-Leste Yohan Goutt Gonçalves iha olimpiade Beijing tinan kotuk, governu sempre fó apoiu maski la boot tanba Yohan Goutt Gonçalves reprezenta povu nia orgullu iha eventu internasionál.

Jornalista: Vito Salvadór