Hatutan.com, (22 Marsu 2023), Díli—Prezidente Repúblika (PR), José Ramos-Horta afirma, odamatan boot Palásiu Prezidensiál Nicolau Lobato Bairru-Pité sempre nakloke ba Xefe Governu Taur Matan Ruak bainhira iha assuntu importante nasaun nian atu diskute.

Prezidente Repúblika José Ramos-Horta. Foto/Elio dos Santos da Costa.

Prezidente Repúblika, José Ramos-Horta hato’o deklarasaun ne’e hodi responde preokupasaun ne’ebé jornalista sira hato’o relasiona ho líder órgaun soberanu rua laiha enkontru semanál to’o agora.

Lee Mós: Primeiru-Ministru La Mai Hasoru Prezidente Repúblika iha Palásiu Prezidensiál

“Asuntu ho Xefe Governu iha ka laiha ne’e buat ida ne’ebé pessoál. Ha’u laiha duni buat ruma ne’ebé boot atu ko’alia ho Primeiru Ministru. Maibé, ha’u nia odamatan sempre loke enkuantu Xefe Governu laiha problema ho ida-ne’e, ha’u laiha asuntu ruma,” Prezidente Repúblika, José Ramos-Horta hateten iha Elizabeth Room City 8 Manleu, Kuarta (22/03/2023).

Xefe Estadu ne’e hatutan, eleisaun Parlamentár besik ona no governu mós atu remata mandatu. Tanba ne’e, Governu tenke prepara relatóriu finál enkuantu iha fim mandatu tenke aprezenta duni relatóriu.

Governu foun mai tenke iha duni relatóriu ho auditoria, governu foun ruma mai tenke ejize auditoria hosi VIII governu konstitusionál tanba osan lubuk ida hamtuk Billiaun $7.

“Ha’u mak Primeiru Ministru foun, ha’u ejize auditoria kompletu A to’o Z. Ha’u hatene saida mak ha’u simu purtantu governu preokupadu ho ida-ne’e prepara daudaun ona. Relatóriu ne’e verifikadu hosi Tribunais Kontas hosi auditória independente barak loos sei halo,” Ramos-Horta afirma.

Molok ne’e, Primeiru Ministru Taur Matan Ruak hateten, daudaun ne’e seidauk iha ajenda importante ruma hodi hala’o enkontru semanál ho Prezidente Repúblika maibé iha tempu balun ajenda importante ligadu distinu nasaun nian sei informa ba Prezidente Repúblika

Tuir ajenda normál kada kinta-feira, Primeiru Ministru Taur Matan-Ruak hala’o enkontru semanál ho Prezidente Repúblika, Josè Ramos-Horta hodi informa kona-bá servisu órgaun ezekutivu nian.

Jornalista: Vito Salvadór