Hatutan.com (29 Novembru 2021), Díli-Tribunál Distritál Dili (TDD) kontinua hala’o julgamentu ba tezoureiru rekolla taxa iha Diresaun Nasionál Imigrasaun ho inisiál JC ba krime pekulatu ba uzu relasiona ho rekollamentu taxa.

Iha julgamentu ne’e, arguidu JC deklara ba Tribunál kona-bá arguidu nia servisu mak rekolla taxa husi vistu entrada, prolongasaun vistu turista aero hodi kontribui ba kofre Estadu.

Arguidu rekoñese nia parte mak distribui formuláriu no resibu reseita iha kada postu entrada sira hanesan aeroportu, portu Díli, Batugade, Salele, Aeroportu Suai no Sakato-Oé-Cusse no formuláriu fa’an ba ema estranjeiru kada folia $0.25 no bainhira kada postu distribui hotu ona mak arguiuo sei rekolla hikas osan husi kada postu.

Iha prosesu distribui, rekolla taxa no fa’an formuláriu arguidu rekoñese laiha termu de intriga tanba hetan orientasaun husi superior katak hodi atende nesesidade imigrasaun iha tempu emerjénsia bainhira osan Estadu seidauk iha.

Hafoin rona arguidu, Tribunal adia hikas julgamentu ba loron seluk hodi kontinua rona sasin sira.

Ministériu Públiku akuza arguidu ba pratika krime pekulatu ba uzu ne’ebé previstu iha artigu 296 husi kódigu penal Timor-Leste, relasiona ho rekollamentu taxa ba kofre Estadu iha kada postu entrada sira hanesan aeroportu Díli, Portu Díli, Batugade, Salele, Aeroportu Suai no Sakato-Oé-Cusse ne’ebé fo prezuizu ba Estadu ho montante $13.200.

Audiénsia julgamentu prezide husi juis koletivu Alvaro M. Freitas, Argentino Luíza Nunes, José Gonçalves MP reprezenta husi Prokuradóra Lidia Soares no arguidu hetan asisténsia legal husi Defensor Públiku Jonas Henrique.

Jornalista: Carmelita Isaac