Hatutan.com, (17 Janeiru 2022), Dili—Tuir kalendáriu, iha Tersa 18 Janeiru, Governu liuhosi Ministériu Edukasaun Juventude no Desportu (MEJD), sei fó-sai rezultadu ezame finál ba estudante sira hotu, iha eskola públiku no priváda sira iha territóriu nasionál.

Nune’e, atu evita estudante sira hala’o konvoi no asidente tráfegu, maka Polísia Nasionál Timor-Leste (PNTL), liuhosi Komandu Munisípiu Díli, planeia ona katak, sei blokeia totál eskola sira iha kapitál Díli.

PNTL Díli, sei koloka nia membru sira liuhosi Ofisiál Polísia Suku (OPS), ba iha eskola sira nune’e mós ekipa forsa rezervada sira sei hala’o mós operasaun hale’u sidade.

“Aban sei fahe kaderneta ba estudante sira ne’ebé remata ona sira nia eskola. Ita sei koloka OPS, nomós ita sei koloka patrulla sira ba iha eskola,liu-liu ba fatin sira ne’ebé mak identifikadu hanesan risku ka ameasa,” Komandante PNTL Munisipiu Dili, Superintendente Xefe Polisia, Hendrique da Costa, informa iha Komandu Jerál Caicoli, Segunda (17/01/2022).

Komandu Díli mós, identifika ona eskola sira ne’ebé durante ne’e, deskonfia mosu beibeik problema bainhira simu rezultadu ezame.

Eskola sira ne’e mak hanesan, tolu iha Postu Administrativu Dom Aleixo, rua iha Cristo Rei, Na’in-Feto iha eskola ida no Vera Cruz iha eskola rua.

Membru sira sei hala’o movimentu no operasaun maka’as, tanba hetan apoiu hosi Unidade Espesiál da Polisia (UEP), Tránzitu Nasionál, Servisu Informasaun Polísia (SIP), Unidade Polísia Marítima (UPM), nune’e mós ho Unidade Patrullamentu Fronteira (UPF).

Jornalista: Rogério Pereira Cárceres