Hatutan.com, (22 Marsu 2022), Díli- Konselleiru Másimu Partidu Kmanek Haburas Unidade Nasional Timor Oan (KHUNTO), José dos Santos Naimori Bucar,  sei konvoka reuniaun nivel estrutura partidu nian atu foti desizaun ho konsensu hodi apoia entre kandidatu Prezidente Repúblika, José Manuel Ramos-Horta ka apoia Francisco Guterres “Lú Olo” karik akontese eleisaun ba Prezidente Repúblika iha segundu volta, 19 fulan-Abríl 2022.

Notísia iha Relasaun: Kontajen Finál, Ramos-Horta Kontinua Lidera ho Votu 301,481

Konselleiru Másimu Partidu KHUNTO, José dos Santos Naimori Bucar. Foto/Hatutan.com

José dos Santos Naimori Bucar hateten, situasaun polítika iha Timor Leste hatudu mudansa ida signifikativu no liuliu iha interna partidu KHUNTO, nune’e estrutura nasionál simu rezultadu eleisaun prezidensiál no iha esperansa atu simu festa demokrasia ba eleisaun parlamentár iha 2023.

Partidu KHUNTO nia tradisaun demokrasia rasik, tuir Naimori Bucar, konsidera partidu polítiku sai hanesan instrumentu nasaun nian, tamba ne’e KHUNTO mantein ho nia pozisaun rasik no seidauk iha desizaun definitivu atu apoiu kandidatu ida ne’ebé iha eleisaun prezidensiál ba segundu volta.

“Partidu KHUNTO ita sei haree tamba ha’u sei organiza reuniaun iha nivel estrutura partidu nian para bele iha desizaun atu apoiu se iha segunda ronde nian,” hateten José dos Santos Naimori Bucar ba jornalista sira hafoin partisipa iha serimónia tomada posse ba membru Governu foun sira iha Palásiu Prezidensiál, Dili, Tersa (22/03/2022).

Naimori Bucar salienta katak KHUNTO oras ne’e hamutuk hela ho FRETELIN no PLP iha VIII Governu Konstitusionál tamba ne’e kona-bá apoiu kandidatu CNRT no FRETELIN iha eleisaun segundu ronde KHUNTO sei tetu nia desizaun hotu atu la prejudika estabilidade Governativa.

Posivel boot, kandidatu rua ne’ebé pasa ba segundu volta eleisaun prezidensiál tinan 2022 maka  hanesan kandidatu husi partidu CNRT, José Manuel Ramos-Horta ne’ebé konkista vitória  maioria simples iha primeira ronde ho votu 301,481 (46,58%) no kandidatu seluk ne’ebé hakat ba segunda ronde mós maka Francisco Guterres Lú Olo husi partidu FRETELIN ne’ebé hetan votu 143,408 (22,16%). 

Eleisaun ba Prezidente Repúblika períodu 2022-2027, Partidu KHUNTO mós avansa ho nia kandidatura, Armanda Berta dos Santos, ne’ebé konsege rekolla votu iha kontazen finál 56,289 (8,70%). 

Jornalista: Vito Salvador