Hatutan.com, (14 Jullu 2022), Díli- Prezidente Repúblika (PR), José Ramos-Horta, Kinta (14/07/2022),  kondekora country Diretór Word Food Program (WFP), Dagen Liu ho Medalla Grau Orden de Timor-Leste.

Lee Mós : Xefe Estadu Kondekora Embaixadór Andrew Jacobs ho Grau Colar Ordem de Timor-Leste

PR José Ramos-Horta, kondekora country Diretór , Dagen Liu ho Medalla Grau Orden de Timor-Leste, Kinta (14/07/2022). Foto/Media GPR

Kondekorasaun ne’e  hodi valoriza kontribuisaun no dedikasaun ne’ebé reprezentante WFP  halo bá nasaun no povu Timor-Leste durante nia mandatu.

José Ramos-Horta hateten, uluk kedas nu’udár Xefe Estadu períodu 2007-2012 nunka haluhan sidadaun estranjeiru ne’ebé mai hala’o misaun iha Timor-Leste nu’udár individu ka reprezenta organizasaun ruma atu rekoñese sira-nia sakrifisiu, sira-nia dedikasaun hodi serbí Nasoins Unidas no povu Timor-Leste iha rai ida ne’e.

Dala barak, Ramos-Horta hateten, ema mai husi sistema Nasoins Unidas nian, balun servisu iha Nova Iorke, balun iha Europa, Áfrika, no balun to’o mai iha Timor-Leste hodi kontinua hatutan mehi no programa sira Nasoins Unidas nian atu tulun povu no nasaun ne’ebé misaun Nasoins Unidas nian.

“Ha’u koñese lubuk ida, sira-nia servisu iha kampu iha situasaun difisil sira. Organizasaun mundiál sira ne’e hanesan esperansa ida no sai mos símbolu  Nasoins Unidas ne’ebé sei importante nafatin bá mundu.  Ne’e duni, bainhira ema mai ita-nia rain, servisu ita-nia tradisaun mak ne’e rekoñese. Xefe Estadu buka rekoñese sira hotu nia servisu iha nasaun ida-ne’e,” Ramos-Horta hateten iha nia diskursu hafoin kondekora Country Diretór WFP ho Medalla Grau Orden de Timor-Leste iha palásiu prezidensiál.

Country Diretór WFP, Dagen Liu hateten, kondekorasaun ida-ne’e hanesan onra boot ida bá nia, bá WFP no mós bá ONU.

“Ha’u nunka hanoin iha ha’u nia moris atu simu kondekorasaun boot ida-ne’e,” Dagen Liu hateten.

Lee Mós : Prezidente Repúblika Kondekora Atleta ho Treinadór Sira ho Medalla Méritu

Tuir nia haree katak  Prezidente Repúblika Ramos-Horta nia lideransa inspira tebes nia no sente kontente tebes hafoin simu Ordem de Timor-Leste ida ne’e. Kondekorasaun ida ne’e sei sai nu’udár onra boot ida bá nia moris tomak.

Hanesan ema luku na’in ka scuba diver no fotografer ida, nia hatene Timor-Leste nia beleza natural sira ne’ebé mak furak tebes iha tasi okos.  Nune’e, nia kontente tebes bainhira halo viajen hale’u Timor-Leste hodi esplora no haree furak natural sira iha tasi okos ne’ebé mak ema seidauk haree.

“Ha’u hanoin Timor-Leste halo barak liu mai ha’u duke saida mak ha’u halo bá nasaun ida ne’e. Obrigadu Timor-Leste,” Dagen Liu hatutan.

Country Diretór WFP Dagen Liu nia misaun iha Timor-Leste durante tinan 4 no termina ona, nune’e nia sei fila hikas bá sede sentra WFP iha Roma, Italia hodi kontinua misaun seluk tuir servisu ne’ebé WFP sei atribui bá nia.

Jornalista: Vito Salvadór