Hatutan.com, (23 Fevereiru 2022), Dili-Prezidente Kompetisaun ASEAN Football Federation (AFF), Francisco Kalbuadi Lay, daudaun ne’e konsentra hela ba lidera  kompetisaun AFF 2022 no apresia ho prestasaun husi selesaun nasionál Timor-Leste U-23 iha jogu AFF U-23 Championship 2022.

Notísia iha Relasaun: Thailándia Rekoñese Difísil Kontra Ekipa TL iha Jogu Apuramentu AFF Cup

Prezidente Kompetisaun AFF, Francisco Kalbuadi Lay. Foto/Espesiál AFF

Daudaun ne’e Francisco Kalbuadi Lay, antigu prezidente FFTL hala’o hela knar no responsabilidade boot ida hanesan prezidente kompetisaun AFF no akompaña hela jogadór-sira selesaun nasionál Timor Leste iha jogu AFF U-23 iha Cambodia.

Francisco Kalbuadi Lay, hanesan timoroan hato’o nia orgullu boot ba prestasaun selesaun nasionál U-23 ne’ebé konsege lori Timor-Leste hakat to’o ona iha faze semi-finál.   

Daudaun ne’e, selesaun lafaek ne’e hein de’it ona jogu tuir mai iha semi finál kontra Vietnam. Entretantu, iha jogu semi finál AFF U-23 2022 ne’e, nasaun haat mak hakat ba semi finál kompostu husi Timor Leste,  Laos, Vietnam ho Tailándia.

“Ita merese orgullu ho prestasaun ne’ebé ita-nia jogadór sira U-23 hatudu ona iha jogu AFF Championship U-23 2022 iha Cambodia. Prestasaun ida-ne’e hetan mós apresiasaun husi nasaun oioin tanba foin ba dahuluk Timor-Leste tama to’o ona semi finál,”   Prezidente Kompetisaun ASEAN Football Federation (AFF), Francisco Kalbuadi Lay hateten hodi responde Hatutan.com via telefónika husi rai-li’ur, Tersa (23/02/2022).

Buat ne’ebé sai preokupasaun iha durante jogu la’o to’o Timor-Leste sai hanesan kampiaun grupu A, maibé laiha ofisiál ka dirijente Federasaun Futeból Timor-Leste (FFTL) ida mak akompaña jogadór sira  iha ema nia-rain.

Grupu A iha jogu AFF U-23 Championship 2022 ne’e, kompostu husi Timor-Leste, Filipina, Cambodia no Brunei Darussalam.

“Ha’u hanesan timoroan no nudár prezidente kompetisaun AFF nian  ho Embaixadór Timor-Leste ba Cambodia, Hermenegildo Kupa Lopes no Estudante timoroan na’in-10 mak ajuda akompaña hela ita-nia jogadór sira no suporta hela sira to’o ohin loron. Laiha ezekutivu ka dirijente ruma husi FFTL nian mai tau-matan ba ita-nia jogadór sira-ne’e,” Francisco Kalbuadi Lay haktuir.

Ho talentu no prestasaun jogadór selesaun nasionál Timor-Leste nian ne’e,  halo klube estranjeiru lubun maka hateke kona talentu jogadór timoroan na’in-rua; Paulo Galy Freitas ho Muozinho Berreto de Lima.

Prezidente Kompetisaun ASEAN Football Federation (AFF), Francisco Kalbuadi Lay, informa, iha loron hirak-ne’e klube estranjeiru lubun ida mak kontakta direta ba nia husu kona-bá jogadór timoroan; Paulo Galy Freitas ho Muozinho Berreto de Lima.

“Ha’u fó hatene ba klube sira husi nasaun estranjeiru sira-ne’e, katak di’ak liu, sira maka kontaktu direita ho jogadór na’in-rua ne’e ninia klube rasik atu oinsá mak ko’alia ba malu,” Francisco Kalbuadi Lay, informa.

Selesaun nasionál Timor-Leste U-23 hetan susesu boot hafoin halakon nia adversáriu Cambodia iha jogu ikus grupu A AFF Championship U-23 2022.

Vitoria Timor-Leste nian ne’ebé hetan liu husi jogu iha Morodok Techno National Stadium, Phnom Penh, Domingu (20/02/2022), lori Timor Leste U-23 sai kampiaun grupu A AFF Championship U-23 2022.

Sita husi bolatimes.com katak Timor Leste termina nia kompetisaun ho pontu hitu (7) husi jogu datoluk iha faze grupu A nian. Prestasaun ne’e lori Timor Leste sai hanesan kampiaun grupu A no iha direitu hetan tiketi ba semi finál AFF Championship U-23 2022.

Jornalista: Vito Salvadór