Hatutan.com, (18 Janeiru 2022), Díli—Iha tempu badak nia laran, hahu hosi 06 to’o 18 Janeiru, Primeiru Ministru (PM), Taur Matan Ruak, konsege hale’u munisípiu 12, inklui Rejiaun Administrativa Espesiál Oecusse Ambeno (RAEOA) hodi hala’o diálogu ho Autoridade munisipál no autoridade komunitária. 

Komunidade RAEOA simu Primeiru Ministru, Taur Matan Ruak iha Portu Mahata ho Tara tais. Foto/Média GPM.

Hahú iha Kinta 06 Janeiru 2022, Primeiru Ministru (PM), Taur Matan Ruak akompañadu hosi Ministru Administrasaun Estatál (MAE), Miguel Pereira de Carvalho, inisia diálogu ho Autoridade lokál iha Postu Administrativu Manatuto Vila, Munisipiu Manatuto, ho tema “Reforsa Reziliénsia Nasaun Nian”.

Iha loron hanesan, oras lorokraik, PM Taur Matan Ruak, kontinua vizita ba Munisípiu Baucau, hodi hala’o diálogu ho autoridade munisipál sira, lider komunitáriu no xefe departamentu setórial sira iha Sentru Konvensaun Baucau.

“Diálogu ne’e ho tema, reforsa reziliénsia nasaun nian, ho objetivu reforsa reziliénsia hosi servisu hamutuk lori nasaun ba oin, embora hasoru situasaun oioin,” Hatutan.com sita hosi pájina ofisiál PM Taur Matan Ruak nian.

Iha Sesta 07 Janeiru 2022, PM Taur Matan Ruak ho komitiva kontinua fali diálogu ho autoridade munisipál, no lider komunitáriu iha postu administrativu lima iha Lospalos Vila, Munisípiu Lautém.

Pontu hosi diálogu ne’e, Xefe Governu husu ba autoridade munisipiu no lider komunitáriu sira atu kontinua enkoraza komunidade ne’ebé seidauk simu vasina, atu simu vasina kontra Covid-19. Tanba oras ne’e, mosu tán ona variante foun ida ho naran Omicron ne’ebé espalla ona iha nasaun barak.

Husu mós ba Autoridade Munisipál atu ezekuta ho di’ak Orsamentu Jerál Estadu tinan 2022 nian ne’ebé alokadu ba munisipiu no suku sira hanesan Uma ba Kbi’it Laek no programa dezenvolvimentu suku sira seluk.

Iha fali Sábadu, 08 Janeiru 2022 Primeiru Ministru (PM), Taur Matan Ruak, esplika objetivu importante sira hosi diálogu ne’ebé halo, hodi husu ba autoridade munisipál no lider komunitária no lia-na’in sira iha Munisípiu Vikeke, atu konsiensializa sira hodi kontribui ba Pás no estabilidade durante periudu eleisaun Prezidensiál tinan ne’e.

“Ita bele iha problema, bele iha dezentendimentu tanba hanoin la hanesan ba nasaun, importante mak labele hanoin atu sobu ka harahun nasaun ne’ebé ita hari’i hosi sofrimentu oioin,” PM Taur, hateten.

PM Taur mós aprésia no fó parabéns ba povu Munisipiu Vikeke ba tasa partisipasaun vasinasaun kontra Covid-19, ne’ebé nasionalmente Vikeke tuur iha fatin datoluk.

Taur husu ba autoridade munisipiu no lider komunitáriu sira atu konsiensializa povu kuda produtu barak, tanba Governu prevee ona orsamentu milliaun $89, hodi sosa produtu hosi povu.

Iha Segunda, 10 Janeiru PM Taur Matan Ruak kontinua kedan vizita Kosta Súl hodi hala’o diálogu ho autoridade munisipál, lider komunitáreria iha Same, Munisipiu Manufahi.

Iha Manufahi, PM Taur, haktuir kona-bá dezafiu no progresu balun ne’ebé VIII Governu iha no hato’o mensajen ba autoridade lokál ba dezafiu sira ne’ebé sei mai iha 2022, no eleisaun Prezidente tinan ida ne’e.

Dezafiu sira ne’ebé VIII Governu hasoru, ida maka, instabilidade poltika, pandemia Covid-19 no dezastre naturais hodi provoka ekonomia nasaun nian monu.

Maski nune’e, Governu konsege jere situasaun sira ne’e, nune’e bele kontinua programa dezenvolvimentu, liu-liu rekoperasaun ekonómika.

Progresu ne’ebé VIII Governu Konstitusionál iha mak hanesan, halo ona lansamentu ba futuru Sidade Universitária Aileu, konklui ona estudu ba Aeroportu Nicolau Lobato, Comoro no daudaun ne’e iha hela prosesu aprovizionamentu no tinan ne’e bele hahú ona obra.

Alende ne’e, konklui ona dezeñu detalladu ba Hospitál Nacional Guido Valadáres no Ospitál Lahane, konklui ona mós projetu kabu submariñu ne’ebé sei dada hosi Austrália mai TL.    

Taur mós kontinua fó hanoin ba Manufahi-oan sira atu prepara aan hodi enfrenta pandemia Covid-19 ho variante foun Omicron, no husu mós atu simu vasina.

Manufahi-oan sira tenke prepara aan simu situasaun dezastres naturais, tanba tuir previzaun hosi Meteorolójia nian, iha probabilidade udan ho intensidade boot iha fulan ne’e.

Iha loron ne’ebé hanesan, Xefe governu  ho komitiva kontinua diálogu ho autoridade munisipál no komunitáriu sira iha Munisipiu Ainaro.

Durante diálogu, Primeiru Ministru, Taur Matan Ruak, espresa katak, tuir loloos labele iha tán Estadu Emerjénsia (EE), Serka Sanitária (SS), no Konfinamentu Obrigatóriu.

“Tanba tinan ida ne’e, sei iha eleisaun Prezidensiál no governu lakohi perturba prosesu eleitóral ne’e, alende ne’e, hakarak populasaun livre buka sira nia vida, tanba maioria simu ona vasina,” Taur hateten.

Xefe governu ne’e, husu ba sidadaun sira ne’ebé simu ona vasina doze daruak, liu-liu sira ho tinan 60 ba leten, bele ba simu tán vasina doze datoluk (booster) hodi bele iha imunidade reziste hasoru Omicron, tanba vasina sei barak.

Iha tersa, 11 Janeiru 2022, PM Taur hala’o diálogu iha Munisipiu Covalima (Suai). Iha diskursu, Taur haktuir, governu ne’ebé nia lidera, laiha sorte, tanba ukun hasoru kedas situasaun difísil. Problema ida tán mak krize politika iha koligasaun laran hodi provoka OJE 2020 la iha.

Iha Kuarta, 12 Janeiru 2022 PM Taur, kontinua viájen ba Munisipiu Bobonaro, hodi esplika ba autoridade munisipál no lider komunitáriu sira, kona-bá rajaun VIII Governu hili Batugade, sai Polu ba Dezenvolvimentu, no oras ne’e sei iha estudu viabilidade, tanba lakohi atividade merkadoria hosi Kupang ba liu Dili, hakarak importasaun ho esportasaun nian baze iha Batugade.

Iha loron hanesan, oras lorokraik, PM Taur Matan Ruak, kontinua kedam mai Munisipiu Likisá, hodi husu ba autoridade Munisipál no Komunitária sira, atu servisu hamutuk ho autoridade Polisial no Governu Sentrál fó susesu ba eleisaun Prezidensial iha tinan ida ne’e.

Komunidade Ermera simu Primeiru Ministru Taur Matan Ruak. Foto/Média PM.

Iha loron Kinta, 13 Janeiru 2022, PM Taur Matan Ruak, realiza fali nia diálogu ho autoridade munisipál no lider komunitáriu sira iha Munisipiu Ermera (Gleno).

Taur husu ba autoridade lokál no komunitáriu sira atu servisu hamutuk ho autoridade Polisial sira hodi fó susesu ba Eleisaun Prezidensial, iha 19 Marsu tinan ne’e.

Primeiru Ministru (PM), Taur Matan Ruak, iha Sesta, 14 Janeiru realiza eventu ne’ebé hanesan ho autoridade munisipál no komunitáriu sira iha Centro de Convenções Dili (CCD), iha kapitál nasaun.

Iha 18 Janeiru, PM Taur, hala’o diálogu ho autoridade munisipál no komunitáriu sira iha Rejiaun Administrativa Espesiál Oecusse Ambeno (RAEOA).

“Husu Atoni oan sira, rai ketak tiha kores partidu, lori Oecusse ba oin, tanba Oecusse iha Atoni oan sira nia liman,” PM Taur hateten.

Ohin mós Primeiru Ministru fila hikas mai kapitál nasaun, maski tempu badak de’it maibé Xefe Governu ne’e konsege hale’u munisípiu 12 ho RAEOA (maratona).

Jornalista: Rogério Pereira Cárceres